Sunday, March 9, 2025

ṬAWNGṬAINA HMANGIN I HMATHLIR TE TITHAR LEH RAWH

_Hringnuna Damna Rahbi_

- Rick Warren 
- March 09, 2025
_"Anni chuan a hnenah, 'Mit var kan duh,' an ti a. Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a."_ (Matthaia 20:33-34)

Tunlai khawvelah hian en thlirna tarmit nge in vuah le? Lungawina leh lawmna rilru in pu a ni mai thei. Chutiang rilru i pu a nih chuan a lawmawm hle ang! Mahse thil dik lo ngaihtuahna lamah i tang mek a kal ngaihna i hre lo anih chuan i hmathlir i pelh loh nan Pathianin i harh chhuah leh a duh a ni.

Mahse chu chu ṭawngṭaina nen chauha thleng thei a ni.

Chinṭhan ṭha lo deuhin emaw, hliamin emaw, rilru buainain emaw a nang ching che a i chhuak thei lo a ni mai thei. Midangte nena inlaichinna ṭha lo emaw, rilru hrisel lo emaw, nundan ṭha lo emaw a ni thei. Engpawhnise, *ṭawngṭaina nen i hmathlir i nei let leh thei a, i la hmuh ngai loh thilte i hmu thei ang.*

Bible-ah hian mitdel pahnih, an ṭawngṭai hnu lawka mit var ta hmuh tur an awm. Bible chuan heti hian a ti, _"Anni chuan a hnenah, 'Mit var kan duh,' an ti a. Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a."_ (Matthaia 20:33-34). Hei hi nimin lama Hezekia ṭawngṭaina kan tarlan tak anga thinlung taka ṭawngṭaina/dilna a ni.

Mahse mipuite khan mitdelte kha ngawi turin an lo ti a. Mahse an au ring sawt a, Isuan dingin an hnenah, _"In chungah engtia ka tih nge in duh?"_ tiin a zawt a (Matthaia 20:32). A mawi ka ti hle mai. Isuan an duh dil turin a ti a. I chungah pawh hetiang hian a ti ang. I mamawh a hnena i thlen a duh a ni. Isua hnena i duh i thlen apiang khan i ṭawngṭai tihna a ni.

Tichuan, Isua an chhang a, _"'Mit var kan duh,' an ti a. Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a."_ (Matthaia 20:33-34)

Hei hi a inkhaidiat ṭha viau lo maw? I ṭawngṭai a, i dam a, Isua i zui ta a. Pathian thlirna mit aṭanga hringnun hi i thlir chuan i la hmuh ngaih loh thil i hmu ang. I kawppui, ṭhian te, chhung te, thawhpui te leh i la hriat ngai loh mite thlengin hlutna nei, pawm theih mi leh ngaihdam theih mi niin i hmu ang. Nangmah pawh chutiang chuan i inhmu ang. I thlirna tarmit a dang daih dawn anih chu.

Bible chuan Marka 6:34-ah chuan heti hian min hrilh, _"Tichuan ani [Isua] chu vukama a chhuah chuan mipui tam tak a hmu a, vengtu nei lo beramte ang an nih avangin a khawngaih ta em em a, thu tam tak a zirtir ta a."_ Chu chu Isuan mipui a hmuh dan a ni - khawngaihna nen. I tan, hmangaih te tan, i ṭhenawm-khawveng te tan, i ram tan leh khawvel zawng zawng tan i khawngaihna kha tihthar leh a duh a ni.

A hnung i zui a, Isua hmuh anga midangte i hmuh ve theihna turin Pathian hnenah i hmathlir nei let leh turin dil rawh.

Ngaihtuah zui atan.

I eng suangtuahna ṭha lo kha nge Pathianin thlak tura a tih che?

Isua hnenah i mamawh te thlen thei lo turin engin nge dal che?

Midang i hmuh dan leh mahni ngei i inhmuh dan engtinnge Pathianin a thlak danglam duh ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...