Thursday, March 13, 2025

I ṬHATNA TUR HLIRIN PATHIANIN HNA A THAWK

_Pathian Mit Aṭanga Thlirna_

By Rick Warren
— March 13, 2025
“Fiahna tinrêng in tawha, in mangan pawhin hlim takin awm rawh u. In rinna fiahna tûr a ni, rangkachak chhe thei mah meia fiah a ni a, a aia hlu zâwk, in rinna chu, fiah tûr a ni asin; tichuan, Isua Krista a lo inlâr hunah fakna te, ropuina te, chawimawina te in hlawh ang.” [I Peter 1:6–7]

Mihring nunah hian thil thleng palh a awm tak tak lo. Mihring nun hi thil buai nuai a ni lova. Awmze nei lo a ni hek lo. Pathianin thil thleng engkim a hria. Dik tak chuan, i nuna hun hrang hrangte kha a hmang vek – hun hlimawm leh hun hrehawmte kha – thawnthu ngaihnawm tak din turin a hmang vel vek a ni. 

Pathian fa i nih takzet chuan Pathian remtihna tel lovin i nunah engmah a thleng ngai lo vang. Engkim mai hi Pa duh dan tihpuitlinna hmanrua a ni. 

Hre sual suh. Thil thleng zawng zawngte hi Pathian remruatnaa famkim ang taka thleng vek an ni e ka ti lo. Chu chu a dik lo. Thil i tihsual chu Pathian duh dan a ni lo. Miten i laka thil an tihsual pawh chu Pathian remruatnaa famkim chu a la ni chuang lo. 

Mahse Pathian chuan a lo remtihpui mai chang a nei thung. Ṭawngkam danga kan sawi dawn chuan, amahin ti chuang lo mahse remtihpui chang a nei. Entirnan, chaw ka ei tam lutuk chuan, ka hrisel lovin kan dam lo sek ang. Pathian vanga chu chu thleng a ni lo, mahse ani chuan a remti thung. Chutiang deuh chiah chuan, Pathian chuan thil ṭha a thlen a remtiin tuarna a awm a remti a. Chung thil an awm chu a remti a – amah pawhin a hmang bawk. 

Engtiangin nge Pathianin sual leh natna a hman ṭhin? Thil ṭha lo thil ṭha zawka chantir chu a thiam zawng tak a ni! Philipi khuaa tan in aṭang khan Paula khan a hruai chhuak thei khawp mai, mahse Paula kha tan ina a tan a phal a, tan in vengtu kha ringtu a lo ni ta thung a nih kha. Pathian chuan Isua kha kraws a pumpelhtir thei, mahse a tuartirin a thihtir a nih kha – chu thilpek avang chuan, chhandamna thil thlawnpek chu amah ringtu tawh phawt tan chuan a lo chan theih ta a ni! 

Pathian chuan khenbeh-nun chu thawhlehna nuna chantir a duh ṭhin. In nuna in thil duh ber ber Pathianin a laksak che u chu Pathianin ni tura a duh dan che u nihtirna hmanraw pawimawh ber ber an lo ni zawk thei. 

Bible chuan hetiangin min tiam, “Fiahna tinrêng in tawha, in mangan pawhin hlim takin awm rawh u. In rinna fiahna tûr a ni, rangkachak chhe thei mah meia fiah a ni a, a aia hlu zâwk, in rinna chu, fiah tûr a ni asin; tichuan, Isua Krista a lo inlâr hunah fakna te, ropuina te, chawimawina te in hlawh ang,” tiin. [I Peter 1:6–7]

Pathian chuan i buaina lian ber chu i ṭhatna ber atan a hmang duh. Natna i neih chang pawhin, chumi piah lam chu thlirin Pathian chu engkim chunga thuneitu a ni tih chu i ring thei ang. 

Tirhkoh Paula chuan hetiang hian a sawi, “Chumi avâng chuan kan zâm lo ve, kan pâwn lam mihring hi awngrawp telh telh mah sela, kan chhûng lam mihring chu ni tin siam tharin a awm zâwk a ni. Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni,” tiin. [II Korinth 4: 16-17] 

Ngaihtuah zui atan. 

I nuna chona hmachhawp i neihteah khan thil duhawm lo inzep ve reng a awm em? Chu chuan rinna kawnga hrual tur leh tiṭhanglian tur chein engtin nge a ṭanpui che? 

I nunah khan engkim a buai vek a, beiseina reng a awm tawh lo nia i hriat changin eng “thawhlehna” ber nge i nunah i lo hmuh ve tawh?  

Engtin nge hun liam tawha i natna chu ṭhanglian tur leh zirlai pawimawh zir tur chuan i lo hman ve tawh? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...