_Hmalam Hun Atana Inbuatsaihna_
Rick Warren
13 Jan 2025
“Nimahsela, rinna lovin ama lâwm zâwng mi nih rual a ni lo.” HEBRAI 11:6
Pathian chuan i hmalam atana hmatiam i duante a ngaihsak hle a. A nihna takah chuan, Pathian lawmzawnga hmatiam i neih chuan kawng thumin hlawkna i nei a:
*Pathian pawmtlak hmatiam chuan rinna kawngah a fiah ang che.* Bible chuan, “Nimahsela, rinna lovin ama lâwm zâwng mi nih rual a ni lo"
(HEBRAI 11:6) a ti a. Pathian tilawm tur chuan, rinna tel ngei ngeina tur hmatiam i neih a tul a ni. Thu dangah chuan, mahnia i ban phak loh hmatiam i neih a tul a ni ber mai.
Hmatiam liantham tak i neih khan, puitham takin Pathian pawh a che thei ang. Hmatiam laihawl i neih chuan, a laihawl tiat leka lianin Pathian a che anga. Hmatiam tê i neih chuan Pathian pawhin tetham takin a pui ang che.
Hmatiam kan neihte hian kan rinna a pawtfan thin a. Pathian i rinngamna a tinghet a, chutih rualin Pathian i rinzia tihlanna a ni bawk. Bible chuan, “In rin angin in chungah thleng rawh se,” (Matthaia 9:29) a ti a ni.
*Pathian pawmtlak hmatiam chuan i mizia a siamtha deuh deuh ang.* Rinna mamawh em emna tur hmatiam i neih chuan, chu zinkawngah chuan i tum i thlen theihna turin nangmah kha tih danglam zel i ni a.
Movie tam tak thawnthu ang mai a ni. A changtu tum chu indona hneh emaw, thla a lawn emaw, Mt. Everest lawn rmaw pawh nise, an tum thleng turin kawng daltu an hneh zel a ngai a. Chumi avang chuan anmahni pawh an lo danglam thin a ni. An lo thang puitling thin.
Pathian chuan thanglian turin min duh a. I thih hunah chuan Vanah i hlawhtlina engmah i chhawm dawn lova. Mahse i mizia erawh i chhawm dawn a ni. Pathian lawmtlak zawnga hmatiam kan neihte hian Pathian duhzawng mizia nei turin min pui thin a ni.
Tirhkoh Paula chuan, "“Hmu tawh reng inti ka ni lo va, famkim tawh reng inti pawh ka ni hek lo; “Krista mi man chhan chu ka man thei dah law maw,” tiin, a ûmin ka ûm zâwk a ni.”
(PHILIPPI 3:12)
*Pathian pawmtlak hmatiam chuan beiseina a pe che.* Tumkhat chu Israel mite an suat vaka damchhuak tlemte, hun harsa lutuk mai paltlangtu te chanchin zirna ka chhiar a. Engtin nge an damchhuah theih? An vai chuan thil in ang pakhat an nei a: beisei tur thil an nei theuh a ni.
Pathian lawmzawng hmatiam chuan a harsat ber lai pawhin tuar hram hram turin tawrh chhan tur min pe a. Jeremia 29:11 ah chuan, “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin" a ti a.
Pathian lawmzawng hmatiam chuan kal zel châkna i neih tawh loh pawhin hmalam pan zel turin beiseina a pe thei che a ni.
Vawiin hian engnge i tawrh mek ka hre lo. Hringnun hi i tan eng ang pawh lo nise, Pathian lawmtlak hmatiam i neih a tul. Rinna nen, i mizia siamtha zel chung leh beiseina siamthar zela awmin lo umzui ta che.
Ngaihtuah zui atan...
Kan hmatiam atana kan ruatte hian Pathian kan rin dan engtin nga a tihfiah thin?
I tum i pan meknaah Pathianin i mizia a siamthat lai engtin nge i hriat?
Vawiin hian i nun engah nge beiseina i mamawh?
(Lettu: Msa)
No comments:
Post a Comment