_Hmalam Hun Atana Inbuatsaihna_
- Rick Warren
- Jan 19, 2025
_"I nunna kha i thinlunga suangtuahnain a kaihhruai avangin thil i suangtuah danah fimkhur rawh."_ (Thufingte 4:23, GNT)
I thil tawn te thlak danglam aiin i rilru thlak danglam kha Pathianin a tuipui zawk.
Kan buaina zawng zawng te, natna te, lungngaihna te, tawrhna te, dam lohna te manganna te Pathianin min lak kiansak vek kan duh. Mahse Pathian erawh chuan nangmah siam phawt che a duh, a chhan chu i rilru i siamthar a i suangtuahna te a danglam phawt loh chuan siam thar lehna a thlen theih loh vang a ni.
Engvangin nge i rilru i thunun thiam a pawimawh em em? A chhan pathum ka han hrilh ang che.
*I ngaihtuahnain i nun a thunun avangin i rilru thunun rawh.*
Thufingte 4:23-ah chuan heti hian kan hmu, _"I nunna kha i thinlunga suangtuahnain a kaihhruai avangin thil i suangtuah danah fimkhur rawh"_ (GNT). I ngaihtuahnate kha a chak em avangin a ṭha lam emaw a chhe lam emawin i nunah nghawng thui tak a nei thei. Entir nan, i ṭhan lan mek laiin tuin emaw, "Hlutna reng i nei lo. Engmah i ni lo" a lo ti che a, i lo pawm viau a ni thei. Chu chu dik lo mahse i lo pawm viau chuan i nun nasa takin a hrual ang.
*I rilru kha sual tan indona hmun anih avangin thunun rawh.*
Thlemna reng rengah hian rilru a tel vek. Rom 7:22-23 ah chuan Paulan heti hian a ti, _"Ka rilru tak takin Pathian dan chungah ka lawm si ṭhin a; nimahsela ka taksa pengahte hian dan danglam a awm tih ka hria, chu chuan ka rilru dan a do va, ka taksa pengtea sualna dan awm hnenah chuan salah mi hruai ṭhin a."_
I rilru a chauh der ṭhin chhan pakhat chu i thluakah darkar 24 chhung nitin indona a awm ṭhin vang a ni. A nasat ṭhin avangin a hlauhthawnawm ṭhin, a nasat ṭhinna chhan chu i rilru kha i thil neih ropui ber anih vang a ni. Setanan i thil neih ropui ber chu a duh tlat si!
*I rilru thunun rawh, muanna leh lawmna bulpui anih avangin.*
Rilru thunun loh chuan phawklekna a thlen ṭhin a, rilru thunun erawh chuan hahdamna a thlen ṭhin. Rilru thunun loh chuan indona a thlen bawk ṭhin a. Rilru thunun loh chuan rilru hahna a thlen bawk ṭhin. I rilru leh i ngaihtuahna te thunun i tum loh chuan i nunah lungngaihna/hahna tam tak i tawk ang. Mahse rilru thunun ṭhat erawh chuan chakna, himna leh damna a thlen ṭhin.
_"Kan mihring hlui sualnain kan rilru a thunun chuan thihna a thlen ṭhin a. Mahse Thlarau Thianghlimin kan rilru a thunun erawh chuan nunna leh muanna a thlen ṭhin."_ (Rom 8:6, NLT)
Ngaihtuah zui atan.
Pathian lawmzawng engin nge i rilru i tihkhah? Pathian duh lohzawng engin nge i rilru i tihkhah?
Engtinnge rilru thunun i zir?
Rilru thunun kawngah Bible hian engnge pawimawhna a neih?
[Lettu: Mapuia Fanai]
No comments:
Post a Comment