_I Tawpna Tur Hmuchhuak Rawh_
By Rick Warren
— January 23, 2025
“Amaherawhchu, tu pawh dân famkim, min tizalêntu chu bih nguna, chutianga awm renga, ngaithlaa, theihnghilh leh mai lova, a zawma zâwmtu ngei chu a thiltih apiangah a hmuingîl ang.” [Jakoba 1:25]
I nuna Pathian duh dan chu i hre chak a nih chuan Bible-ah a chhanna i hmu thei vek ang. A duh dan laimuah chuan Pathian Thu chu a awm a, Bible i zir chuan chu chuan malsawmna ropui tak a hawnsak ang che.
Bible chuan: Mi suaksualte remruat anga awm ngai lova,
Mi sualte kawng pawha ding ngai lova,
Hmusittute ṭhutphah pawha ṭhu ngai lo mi chu,
a eng a thâwl e.
A lâwmna chu Lalpa danah a ni zâwk a;
A dân thu chu a chhûn a zânin a ngaihtuah ṭhîn.
Ani chu tui luang kianga thing phun,
A hun têa rah ṭhîn, A hnah pawh uai ngai lo
ang hi a ni a;
A thiltih apiang chu
a hmuingîl zêl ang,” tiin a sawi. [Sam 1: 1-3]
Bible zirtirna mila fianrial hun hman chu ngawi renga thut emaw “Ommmmmm” tia chham chiam nen an inang hauh lo. Ngunthluk taka thil ngaihtuah malh malh zawk chu a ni. Bible chang eng emaw chhiar a, ngun taka heng zawhnate hi inzawh a ngai ang:
Hei hi engnge a awmzia?
Hei hi ka nunah engtin nge ka nunpui ve ang?
Engtin nge ka nitin nunah – ka hna leh inah - ka nun chhuahpui ang?
Pathian Thu ngaihtuah tih awmzia chu kan thilhtih leh thutluknate a Thuin a hruai theihna atana ngunthluk taka chhut chu a ni.
Jakoba chuan fiah takin a ngaihtuah dan min kawhhmuh: “Amaherawhchu, tu pawh dân famkim, min tizalêntu chu bih nguna, chutianga awm renga, ngaithlaa, theihnghilh leh mai lova, a zawma zâwmtu ngei chu a thiltih apiangah a hmuingîl ang,” tiin [Jakoba 1:25]
Pathian malsawmna chu i chang duh a nih chuan Jakoban a tih dan kawng li a sawi chu ngaihtuah rawh:
Ngun taka thlek – Ngun takin Bible chhiar rawh
Chhunzawm rawh – Bahlah lovin kal zel rawh
Theihnghilh suh – i thil zir chu hre reng rawh
Hmang chhuak rawh – i nunah hmang rawh.
Ngun taka thlek tih chu chhiar satliah nen a danglam – Pathian Thu chhut chet chet tih a kawk a. Theihnghilh loh tih awmzia chu thinlunga vawng reng tihna a ni. Chuvang chuan a ni sermon sawi laiin kan lo chhinchhiah fo ṭhin. Zir chiannain a tarlan dan chuan darkar 72 chhungin kan thil hriat zaa 95 te chu kan theihnghilh leh a. Kan thu ngaihthlak kan ziak chhuak a nih chuan Pathian thutak vawng tur leh hmang turin kan inbuatsaih tihna a ni.
Bible chuan heng thu hi a uar viau mai: Ngaithla satliah suh – nunpui rawh tih chu.
Pathian Thu chu zirin, chhinchhiahin, nunpuiin i nun tana Pathianin chanvo a buatsaihsak che chu i chang thei ang. A Thua i nun i tulut a nih chuan i thil tihna apiangah i hmuingil zel ang.
Ngaihtuah zui atan.
* Bible mumal taka zirna boruak chu i nitin hun hmanah chuan engtin nge i zeh tel theih ang?
* Pathian Thu zir fan fan chu eng vangin nge a pawimawh em em?
* Bible zirna aṭanga hlawkna i chante lehkha puana ziah chhuah chu engtiang taka hlawk nge a nih?
[ *Lettu:* Peka]
No comments:
Post a Comment