Saturday, December 21, 2024

ISUA TAN HMUN I NEI EM?

Isua tan hmun ka siam dawn em?

- Rick Warren 
- Dec 21, 2024
_"Tin, heti hi a ni a, chuta an awm laiin a hrin a lo hun ta a. Tin, a fa tirah mipa a hring a; puanin an tuam a, khualbuka an len ve tak loh avangin ran chaw pekna thlengah a muttir a."_ (Luka 2:6-7)

Krismas hmasa ber, Isua pian niah khan Mari leh Josefa te kha zinkawng thui tak an zawh zawhin khualbukah an tan hmun a awm tawh loh thu an hria anih kha.

Chanchin ṭha Luka ziakah chuan heti hian kan hmu: "Tin, heti hi a ni a, chuta an awm laiin a hrin a lo hun ta a. Tin, a fa tirah mipa a hring a; puanin an tuam a, khualbuka an len ve tak loh avangin ran chaw pekna thlengah a muttir a."_ (Luka 2:6-7)

An chanchin thlir letin, khualbuk vengtuin Pathian Fapa lo piang tur a hnar tih kan hria a- khualbuk vengtu tan khan Mari, Josefa leh piang mai tur Isua tan khualbuka hmun siamsak kha thil awlsam tak ni turah a ngaih theih. Mahse Krismas ni hmasa bera khualbuk vengtuin Isua tan hmun a neih loh chhan kha vawiina Isua tana hmun kan neih theih loh chhan tam tak nen a inang hle.

*Kan ngaihsak lo.* I rin loh lam daihah Isua a rawn lang ṭhin a, miten i hnenah an sawi ang a, harsatna karah i ṭhan lenna turin a kawhhmuh ṭhin ang che. A rawn inlan ṭhin a, mahse i hmu lo ṭhin mai zawk a ni.

*Kan nunah thil dangin hmun a chang tam.* Bethlehema an harsatna kha chu khualbuk kha hauh lawk vek a ni tawh. He dinhmun hi i thinlung nen a inang hle. I thinlunga Pathian a chenna atana siam i ni. Mahse kan thinlung hi thil dangin a khat ṭhin a, Isua tan hmun a awm ṭhin lo a ni.

Deuteronomy 8:14 thu hi heti hian kan sawi chhawng thei ang, _"Nangmah leh i duhzawng chauh i ngaihtuahin avangin Pathian theihnghilh suh ang che."_ Thil ṭha tam tak ni ve si avangin Isua tan hmun i neih loh phah ve thei tho. Setanan mi ṭha lo takah a chhuah lo che anih pawhin mi buai takah a chhuah ang che. Pathian i ngaihsak lohna tur anih phawt chuan engpawh i rilru la buaitu atan a hmang hreh lo.

*Pathian tan hmun siam a ṭulin kan hre tak tak lo.* Tlang takin sawi ila, Pathian hi kan duh tak tak lo. "Keimah hian ka tlei ve tawk" tiin mahni intodelh niin kan inngai ṭhin. Nun ṭha takin i nung a ni mai thei, mahse kha "nun ṭha" kha a ṭha tawk lo. Nun ṭha zawk i mamawh. I thinlungah Pathian tan hmun i ken loh chuan i dam chhan i ṭhelh der tawh tihna a ni.

Khualbuk vengtu khan Isua tan hmun siamsak tur a ni, mahse a siamsak lo. Kha thil dik lo tho kha thlen nawntir suh.

Pathian nena inzawm tura tih i ni. Isua i hriat chian leh zual a, a tana nun i hman a, chatuana a hnena i chen theih nan vawiin hian i thinlungah hmun kian rawh.

Ngaihtuah zui atan.

Miten Isua tan hmun an ken loh ṭhinna chhan pathumte khi en let leh la. Eng khi nge harsa i tih ber?

Isua tan hmun i ken theih lohna turin i thinlungah engin nge hmun luah khat ber?

I thinlung kawngkhar vengtu niin Isuan luh dila rawn kik angin han ngaihtuah la. Engnge i sawi ang le?

*Isua ringin a hnung zui tura i la inpe lo anih chuan engvangin nge i khawtlai kher ang?*

Isua Krista kaltlanga Pathianin chhandamna a rawn thlen hi a thil phalna lantirna a ni. I sual khan Pathian nen a ṭhen hrang che a. Isua kaltlanga Pathian khawngaihna chauhin amah nena inzawmna nun a neihtir thei che.

Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

I Siamtu nena inzawmna nei tura i inpeih chuan heti hian ṭawngṭai rawh le:

"Isu, ka sualna hian i lak ata min la hrang tawh lo sela ka duh a ni. Nang ka rin phawt che chuan ka sual min ngaidam ang tih min tiam a, min siam chhan ka zir ang a, engtik niah emaw i chatuan van inah min la hruai ang.

"I hmaah ka sual ka puang a, min Chhandamtu i ni tih ka pawm e. Ka sual ka puan a nang ka rin che chuan chhandamin ka awm ang tih min tiam kha. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Ka Lal atan ka thlang a che. Ka nun zawng i tan ka hlan e.

"Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...