Thursday, December 5, 2024

I THINLUNG CHU I RO LEH HUN AWMNAAH A AWM ANG

_Hnuhma Chhinchhiahtlak Hnutchhiah_

By Rick Warren
— December 05, 2024
“I ro awmna apiangah i rilru pawh a awm ang.” [Matthaia 6:21]

Bible chuan, “I ro awmna apiangah i rilru pawh a awm ang,” tiin a sawi. [Matthaia 6:21]

Tichuan i thinlung chu khawiah nge a awm? 

Ho lamte mai a ni a, mahse a dik tlat si. I thinlung chu i ro awmna leh hun [time] hmanna apiangah chuan a awm ang. Mi ṭhenkhat thinlung chu an inah a awm – a chhan chu, chu chu an sum dahna niin an hun tam ber hmanna a ni bawk. Thil chin dawklak [hobby] ṭhenkhatah a awm thei a. Infiamna [sports] eng emaw pawh thinlung awmna chu a ni thei ang.  

I thinlung chu i pawisa i dahna hmun apiangah chuan a awm ang. Eng emaw thil siamna [company] ah chuan i rinna i nghat em? Sumdawnna eng emawah han dahkham teh. I dahkham rual rualin chu sumdawnna chuan i ngaihtuahna a phuar nghal ang. Mahse i sum – i ro chu chu company-ah chuan i dah lo a nih chuan chu company chuan i ngaihtuahna a luah teh chiam lo thung ang.  

I hun hmanna chuan i thil ngaih pawimawh a tarlang zel a ni. I fate chu i hmangaih nia i sawi a nih chuan anmahni nen chuan hun i hmang em? Hun i hmanpui lem lo a nih chuan hmangaih anga i inngaih ang em em chuan i lo hmangaih hauh lo tihna a ni. Pian nalh i duh anga i sawi chung chuan insawizawina atan hun i hmang lo em? I hmang lo a nih chuan pian nalh chu i thlahlel em em lo tihna a ni ang. 

Isua chu hmangaih angin i insawi mai thei, mahse amah nen hun in hmang ngai lo a nih chuan amah hmangaih anga i inngaih ang em em chuan i hmangaih hauh lo tihna a ni. 

Chutah chiah chuan mi tute emaw an thil ngaih pawimawh tak tak chu a hriat theih ṭhin: An calender en la, an sum hman dan en bawk ang che. I hun hman dan leh i sum hman dan chuan i nun a tarlang zel ang. 

Hetiang hian i sawi thei ang, “Ka tan chuan hei hi a pawimawh tak zet a ni,” tiin. I thil sawi chu chutiang taka pawimawh chu a ni lo. I thinlung chu i sum awmnaah a awm ang – i hun leh sum dah pawimawh dan chuan a tarlang a ni. 

Pathian hnenah i inhlan chuan i thinlung chuan khawi lam nge a hawi? Amah lam chu hawitirin a duhzawng a entir bawk. Pathian nen hun i hmang a nih chuan amah nen inhnaihin i hre chiang deuh deuh ang. Pathian hnena i hun leh sum i hlan chu amah Pathian chibai bukna a ni – chu chu amah nena thinlung zawmna a ni bawk. 

Vawiin hian i thinlung chu khawiah nge a awm? Khawiah nge awm sela i duh? I thinlung awmna atana i duhna hmunah chuan i hun leh sum te chu dah ang che. Rei loteah i thinlung chu a awm ve zat a ni tih i hmu thuai ang.
 
Ngaihtuah zui atan. 

Tuten emaw i sum khawhral dan emaw hun hman dan emaw an sawi chuan i thil ngaih pawimawh zawng chu engtiangin nge an tarlan ang? 

Engtiangin nge i hun leh sum hman danah chuan thil i herrem ang a, i thinlung chu hmun dik takah chuan i awmtir theih ang? 

I hun leh sum Pathian hnena hlan chu engtiang takin nge Pathian chibai bukna a nih theih? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...