_Tihnghin Rual Loh_
- Rick Warren
- Nov 3, 2024
_"Mi fing pâwl la, i lo fing ang a, Mi â pâwl erawh chu hrehawm tuar phahna a ni."_ (Thufingte 13:22)
Nang leh kei hian mahni mai chuan Pathianin min beisei ang mi kan ni thei dawn lo. Chutianga mahnia thleng thei mai tura duan kan ni hek lo. Min zirtirtu tur, an thil tawn te min hrilhtu tur, kan nuna chi tuh a, kan ṭhan len theihna tura min fuihtu tur mamawh vek kan ni.
Bible chuan heti hian min hrilh, _"Mi fing pâwl la, i lo fing ang a, Mi â pâwl erawh chu hrehawm tuar phahna a ni."_ (Thufingte 13:22)
Mahni chauha kan mai mai loh hi a finthlak a, midangte nen kan thiltawn inhrilhtawn a, inzritawn hi thil finthlak tak a ni. Pathianin a kohna che anga i nun theih nan mi chi li hnen aṭang tala i inzir a ngai:
*Zirtirtu (zilh fingtu):* Thil zirtirtu che an ni. Kei hian min zirtirtu chi hrang hrang pakua ka nei ṭhin, vawiin ka thlen theihna tura min hrualtute an ni. Mimal pakhatin i mamawh zawng zawng an zirtir thei lo che. Mi pakhatin kawng khat a zirtir che anga. Mi pakhatin kawng dang a zirtir leh ang che.
*Entawn tur mi.* Heng mite hian i thil tih duhzawng ang kha tiin tawnhriat ṭha tak an lo nei tawh. I hlawhtlin theih nan an finna te, an lo tawn tawhte leh an lo tihsual tawh ngeite pawh kha an hrilhhria ang che. Thil tam tak i lo zir tawh kha midangte nun aṭanga i zir a ni - tin, zir tur tam tak a la awm bawk.
*Thawhpui.* I eizawnnaah thawhpui tur, thlawptu tur che leh i nuna Pathianin tih duh a neih hriatna kawnga chona petu tur che i mamawh. Heng mite hi a ṭha lam emaw a ṭha lo lema emaw a i nuna karfung vuantute an ni.
*Ṭhiante.* Ṭhiante hian i tum i hlenna kawngah an pui ringawt lo che (pui thei reng che mahse). Ṭhian an ni mai. Engpawh ti la an hmangaih tlat che. I intalhnawk a ni viau thei, mahse an hmangaih tlat che. Mi zawng zawngin an hnungchhawn lai che pawhin i ṭhian chu i kiangah a awm reng. Chutiang hunah chiah chuan tunge i ṭhian chu tih i hria ang.
Mahni maia khawsak tum hi a khawharthlak a ni satliah lo, Pathian min duan dang kalh tlat a ni.
Ṭhian zawng la, an tan awm reng la, i nuna hmun an chan pawimawhzia Pathianin a ruat chu hriattir rawh.
Ngaihtuah zui atan.
I nuna mi chi li i mamawhte aṭang khian tunge i neih tam ber? Tunge i neih tlem ber?
Engvangin nge mi tam tak hian midangte ṭanpuina tel lova nun an tum ṭhin?
Khing aṭang khian a eng emaw ber khi miten nangmah aṭangin an mamawh ve em?
[Lettu: Mapuia Fanai]
No comments:
Post a Comment