Monday, November 18, 2024

I HLUTNATE KHA HAN SAWI LA, CHUNG ANG CHUAN NUNG RAWH

_I Nun Kalzel Atana Pathian Hmathlir_

Rick Warren
18 Nov, 2024
“Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin.”
‭‭HEBRAI‬ ‭11‬:‭26‬ 

Engnge i tana pawimawh ber? Hlutna i nunin a neih pawimawh i tih ber ber pathum emaw pali emaw engte nge?

Hetah hian thutlukna i nun ti danglam thei tur a awm a: khawvel ngaihhlut ai chuan Pathian ngaihhlut thlang la. Mosia khan a nun tidanglam thei thutlukna a siam a. Chuvang alawm Pathianin a hman!

Hebrai 11:26 ah chuan, “Krista an hmuhsitna chu Aigupta ram rote ai chuan sum ropui zâwkah a ruat a; lâwmman pêk tûr chu a thlîr ṭhin avângin" a ti a. 

Mosia chuan a tana pawimawh tur a zirchiang a. Engnge a tana pawimawh chu a hrefiah a. Chung thil hlu ber berte chu a hria a ni.

Ka tana hlu ber berte chu ka sawi zung zung thei: rinawmna te, inngaihtlawmna te, thilphalnate an ni. Heng thil pathum hmang hian ka nun din chho turin thutlukna hun rei tak liamtaah khan ka siam tawh a. A chhan chu heng thil pathumte hi hruaitu ni mekte tana thang hlauhawm laka chhuahna an nih vang a ni.

I nuna thil pawimawh leh hlu ber ber pathum i sawi ve thei em? I thei lo a nih chuan, chung mil chuan i nung thei ngei lovang tih a chiang reng mai.

Ni dang i liam tir leh hmain, han thu lawk la, mahni han in zawt teh le, "Engnge ka tana pawimawh hi? Ka tana hlu ber berte engte nge?" Ziak chhuak la- a chhan chu, nangmahah i fiah hma loh chuan, chung chu i nunpui thei ngai lovang.

Engvangin nge chung chu a pawimawh em em? I nuna pawimawh i thlanfel theih loh chuan, mi dangin an thlan sak mai ang che. An duh ang angin an duang che anga, an ngaihhlut ang zelin i nung anga, mahni thuin i awm miah lovang.

I tana pawimawh ber ber i hriat a, Pathian ngaih pawimawh mila i nun chuan, Pathianin a hmang ang che a. Mal a sawm ang che.

Ngaihtuah zui atan...

I nuna thil pawimawh ber ber pathumte engte nge?

Chung chu i la chiang lo a nih chuan, i chian theihna turin engnge i tih ang le?

I nuna thil pawimawhte anga i nun theihna turin eng danglamna nge i nunin a mamawh le?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...