_Sawinghin Rual Loh_
By Rick Warren
— November 1, 2024
“Mi tinin inngaitlâwm takin mahni aiin mi dang ṭha zâwkah ruat ṭheuh rawh se.” [Philippi 2:3]
Bible chuan chapona leh inngaihtlawmna dinhmun hi mumal takin ramri a kham a. Chapona chuan mite nena inlaichinna a tihchhiat theih laiin inngaihtlawmna thung chuan mite nena inzawmna a sawhnghet sauh sauh tih chu a ni.
Chapona chu mahni leh mahni inbumna a ni. Nangmah leh nangmah kha i inhmu mai thei lo vang. A nih loh chuan, chapona, sawiselna, inerna, luhlulna leh nun dazat tih thumalte chu an awmze dang awm han ngaihtuah teh. Chung nihna ṭhenkhat chu i nunah i hmu a nih chuan i lo chapo palh thei tihna a ni ang.
Thufingte 16: 18 chuan hetiang hian a sawi, “Chapona chuan boralna a thlen a, Inchhuanna chuan chhiatna a thlen,” tiin a sawi. Hei hi tawngkam danga sawina pakhat chu hetiang deuh hi a ni, “Chapona a awm phawt a, tlak chhiatna a awm a – chapona a san poh leh tlakna a sang ting a ni mai,” tiin.
Chapona chuan inlaichinna a tichhia a, mahse inngaihtlawmna chu chapona siamṭhatna a ni. Tlawmna chuan inlaichinna a siamṭha thung. Bible chuan I Petera 3: 8 ah chuan hetiang hian a sawi, “A tâwp berah chuan, in za-in rilru hmun khat pu ula, inlainatin unau angin inhmangaih tawn ula, inkhawngaih tawnin thuhnuairawlh takin awm rawh u,” tiin.
Tlawmna nunah chuan engtin nge i ṭhan len zel theih ang? I ngaihtuahna, thinlung, thlirna, leh duhthlanna te chu Isua hnenah a thar zelna nun hmang chuan i ṭhang lian thei ang. Thanglian tur chuan i lo remtih ve a ngai thung. Ephesi 4: 23-24 chuan hetiang hian a sawi, “In rilru leh thinlung chu tihthar ni sela, thutaka chhuak, dikna leh thianghlimnaa Pathian anga siam mihring thar chuan inthuam rawh u,” tiin.
Mihring thar chu engtin nge i nih theih ang? Ngaihtuahna thar chu engtin nge i neih theih ang? Inlaichinna thua a rahbi hmasa ber chu hei hi a ni: I mi kawm mihring chu i ang deuh deuh ang. Mi phunchiar tak bula i awm fo chuan i lo phunchiar deuh deuh ang. Mi hlim thei tak bulah chuan i hlim deuh deuh thung ang. Mihring inngaitlawm nih i duh chuan Isua bulah hun hmang tam ang che. A hnenah ṭawngṭaiin a Thu chhiarin a kiangah hun tam zawk hmang ang che. Ani chu a inngaitlawm a, amah chu i hriat chian deuh deuh ang zelin amah i ang deuh deuh ang.
Bible chuan hetiang hian a zirtir, “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma, Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a. Tin, mihring anga lo awmin a inngaitlâwm a, thi khawp hiala thu zâwmin a lo awm ta a, kraws-a thihna ngei chu,” tiin [Philipi 2: 5-8].
Isua tlukna tlawmna nun nunchhuahpuitu chu tu mah an la awm ngai lo. Van aṭanga lo chhukin khawvelah mihringte angin a lo awm a, a nunna kan tan a hlan a, kan tan kaihthawh a ni leh ta a ni. A kingah hun i hmang a nih chuan i inphah hniam ve zel ang a, chu chuan midangte nena in inlaichinna pawh a siamṭha zel ang.
Ngaihtuah zui atan.
Mi inngaitlawmte nungchang leh thiltih ṭhin te chu engte nge ni?
Isua ngaihtuahna anga i ngaihtuah theih nan i rilru put hmangte chu engtin nge i thlak danglam theih ang?
Midangte chawimawi chu mahni inchawimawi ai chuan eng vangin nge thil ṭha zawk a nih?
[ *Lettu:* Peka]
No comments:
Post a Comment