Thursday, October 31, 2024

MI HLAWHTLINGIN MI RETHEI AN ṬANPUI

_Sawinghin Rual Loh_

By Rick Warren
— Oct 31, 2024
“Ṭawngtheilote tân i kâ âng la,
Hnuchhawnho zawng zawng
chungchâng thûah te.
I kâ âng la, fel takin rorêl la,
Mi rethei leh renchhamte
chungah rorêl rawh.” [Thufingte 31:8-9]

Mi hlawhtling ni duh tan Bible chuan zirtirna mihring nun dan pangngai nena inkawkalh tlat a sawi a: Chu chu mi rethei ṭanpui rawh tih a ni!

Engtin nge mi rethei ṭanpuina chuan mi hlawhtling a nihtir ang che? Bible chuan a chhan hrang hrang a sawi a. A chhan ṭhenkhatte chu hengte hi an ni: 

A tilawm ang che. Ṭhenawmte hmusittu chu mi sual a ni a,
Retheite lainattu chu mi nihlawh a ni. [Thufingte 14: 21]

Pathian i chawimawi ang. Retheite nêkchêp hi siamtu hmuhsitna a ni;
Pachhiate lainattu chuan a chawimawi a ni. [Thufingte 14: 21]

Hruaitu tha a nihtir ang che. Mi retheite rinawm taka
rorêlsaktu lal chu,
A lalṭhutthlêng chu kumkhuaa
tihngheh a ni ang. [Thufingte 29: 14]

Chu chu ka nun chiah a ni tih ka hmu tawh. Ṭhenkhat chuan ka chanchin in hre tawh ang. Ka lehkhabu The Purpose Driven Life tih ka ziah khan khawvel pum deng chhuak khawpin a hlawhtling phak a nih kha. 

Chu lehkhabua phek hmasa berah chuan “Nangma chungchang a ni lo,” tih thua bul ṭan a ni. Sum emaw sumin a ken tel thiltihtheihna emaw chu i tana siam an ni lo tihna a ni. Tichuan – thutlukna dang eng emawzat kan siamte nen chuan – ka nupui, Kay-i leh kei chuan pawl pakhat Acts of Mercy (Lainatna Thiltih), mi rethei leh chanhai AIDS veite ṭanpuina tura pawl kan din ta a ni.  

Chu lehkhabu hlawhtlinna chu keima thuhla a ni lo. Pathian tan a ni tawp. 

Thufingte 31:8-9 chuan hetiang hian a sawi: “Ṭawngtheilote tân i kâ âng la, hnuchhawnho zawng zawng chungchâng thûah te. I kâ âng la, fel takin rorêl la, mi rethei leh renchhamte chungah rorêl rawh,” tiin. 

Chu chu mi hlawhtlingte thiltih a ni. Mahnia ding thei lote chu an dinsak tihna a ni. 

Pathian chuan eng ang hlawhtlinna nge a chantir che? Pawisa a ni em? Mite ngaihhlut nihna chu a ni em? Ṭhian leh chhungkaw duhawm tak takte an ni em? Chung hlawhtlinna i chante chu engtiangin nge i ṭanpui theih ang? 

Ngaihtuah zui atan. 

Mi hlawhtlingte tan mi rethei ṭanpui chu eng vangin nge a pawimawh a, mahnia ding ve thei lote tana lo dinsak chu engtiang taka pawimawh nge a nih? 

Mi rethei leh vanduaite ṭanpui chu eng vangin nge khawvel kalphung kalh a nih? 

Mi retheite tanpui turin eng nge rinawm taka i tih ngai? 

Isua chu innghahna nghing ve lo a ni. 

Isua chu i chhandamna a ni a, kulhpui nghing ve ngai lo tur a ni. 

Hetiang hian a sawi, Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni. 25Ruahte a lo sûr a, tuite a lo lian a, thlite a lo tleh a, chu in chu a rawn nam sawk sawk a; nimahsela, a chim lo va; lungpui chunga rem tlat a nih avângin.
[Matthaia 7:24-25]

Pathian chu a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...