Friday, November 15, 2024

BUAINA HMUNA RAHBI PARUK: TLAWM TAKIN PATHIAN HMAAH SUAL PUANG RAWH

_Sawinghin Rual Loh_ !

by Rick Warren
— November 15, 2024
“Kan sual a, kan ṭha lo va, thil dik lo kan ti a, i thupêk leh i dânte kan hawisan a. Kan lal te, kan hotu te, kan pa te leh hnam pum hnêna i chhiahhlawh i zâwlneiten i hminga thu an sawi chu kan ngaithla duh lo va.” [Daniala 9:5-6]

Tun hnaia fianrial thuzir kan hman tawhhoah khan hun harsaa ṭawngṭai dan kan zir tawh a nih kha. Daniala chuan kalphung [principle] paruk thu Daniala lehkhabu bung 9naah chuan min hrilh. Chung thupui panga awm te chu hengte hi an ni: 

Kan ṭawng hmain Pathian chu ṭawng rawh se. 
Pathian lam hawiin amah chu zawng ang che. 
Phurna nen i duhzawng lantir ang che. 
Chawnghei hmangin i tihtakzetzia lantir ang che. 
A hmangaihna leh a thutiamte avangin Pathian hnenah lawmthu hrilh rawh. 
A tawp berah chuan, kan sualte avanga inngaitlawma kan inpuan a ngai. 

Pathian chuan chapo taka phuntu chu a ngaithla hauh lo vang, mahse tlawmna thinlung nena inpuanna erawh a ngaithla ang. Pathian chuan mi tlawm thil dilna chu a chhang ṭhin. I hun liam tawha a deuh deuha i chet tawhna chu a hre vek, mahse i sualna puang tur chuan a duh tho che. 

Pathian hmaah chuan tlawm taka i chetsualna i pawm a nih chuan engtin nge a chhan ang che. Ngaihdamna, lainatna leh khawngaihnain a lo dawngsawng ang che. 

Sual puanna tih awmzia chu i sualna thuah chuan Pathian ngaihdan i ṭawmpui tihna a ni. Pathian hnenah a tidik tih i hrilh a – I thil lo tihsual tawh chu sual a ni tih i pawm bawk tihna a ni thung. Chhuanlam siam suh ang che. Tihpalh anga thup mawi tum chi pawh a ni lo. I dik lo a ni tih chu pawm mai rawh. 

Danialan Daniala lehkhabu 9: 5-6a a sawi ang chuan i thil sawiah chuan chiang ang che: “Kan sual a, kan ṭha lo va, thil dik lo kan ti a, i thupêk leh i dânte kan hawisan a. Kan lal te, kan hotu te, kan pa te leh hnam pum hnêna i chhiahhlawh i zâwlneiten i hminga thu an sawi chu kan ngaithla duh lo va,” tiin.  

Daniala pawh chutah chuan a tawp mai bik hauh lo. A sual puanna chu chang 10 chhung khan a chhunzawm a ni.  

Israel fate chuan Pathian laka an rinawm loh avang chuan anmahni leh anmahni chungah zahna leh muanphona an thlentir a ni tih chu a pawm a, Lalpain a thil lo hrilh tawh chu a ngaihtuah duh ta lo a nih kha. 

A chiang kak mai. 

Daniala tawngtainaah chuan kan sualna zep rukte chuan Pathian nena kan inkar a tibo  a ni tiin  a sawi – chu chu kan sualna kan pawm a nih phawt chuan engtiang takin nge Pathian chuan kan tawngtaina a chhan tih a hmuh theih ang. Thinlung tlawm taka amah kan dawr a nih phawt chuan ani chuan min ngaihdam turin a inpeih reng zawk a ni. 

Ngaihtuah zui atan

Kan sualte chu a nihna ang anga Pathian hmaa puan chhuah mai chu eng vangin nge a harsat, Pathian chuan engkim a hre vek sa tih kan hre tho si a?

Eng vangin nge mi thenkhatte chuan rinnaa awm chu harsa an tih? Chutiang chu i nunah a thleng ve tawh em? 

Chu chu i la ti ve ngai lo a nih chuan Pathian tan hun tam zawk hmang a, Pathian tana fianrial hun serh hrangin sual puanna te nei ve ang che. 

Engtiangin nge i chatuan hun i hman dawn? 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...