Friday, November 22, 2024

BIBLE THU CHU NGAITHLA LIAM MAI SUH. VAWNG RAWH

_I Nun Kal zel Atana Pathian Hmathlir_

By Rick Warren
— November 22, 2024
“Ka fapa, ka thu hi ngaihven la,
Ka thu sawi hi bengkhawn rawh.
A bosan che phal suh la,
I thinlungah vawng tlat ang che.
A hmutute tân nunna a ni a,
An taksa tân damna a ni.”  [Thufingte 4:20-22]

Finna thu engemaw i bengin a hriat vang ngawtin mi fing i ni ngai lo vang. Chung finna thu chu i vawn reng bakah i hman chhuah a ngai a ni. A chhan chu i vawng renga i hmang chhuak lo a nih chuan, a tawpah chuan zirlai ngai reng chu i zir nawn awn awn a ṭul ang. 

He finna thu hi Bible chuan Thufingte 22: 17-18 ah hetiang hian min kawhhmuh: Suahsual hi an chaw a ni a, Nunrâwn hi an uain a ni. Mi dikte awm dân erawh chu zîng êng ang hi a ni, A lo êng tial tial a, ni a lo chhuak ta ang hi,” tiin. Thiltih sawina thumal pali te chu han chhinchhiah teh: ngaithla, zir, vawng leh sawi chhuak. Heng te hi finna chhinchhiahna an ni. 

Mite chuan “Engmah hi ka hre thei tak tak love!” tiin an sawi fo. Mahse dik tak chuan kan tana thil pawimawh chu kan vawng thei khawp mai. Kan hmangaih zawngte chu kan chhinchhiah a. Kan tana thil pawimawh tak takte chu kan hre thei teh reng mai. 

Entirnan, hetiang hian i sawi mai thei, “Bible thu chu ka vawng thei miah lo,” tiin. Mahse baseball emaw football chanchin [statistics] eng emaw zatte chu i  chhinchhiah ran ang. I hla duhzawng emaw chawhmeh duhzawng siam dante chu i hre tlat ang a. I tana thil pawimawh chu i hre thei em em ang. 

Bible chuan hetiang hian a sawi, “Ka fapa, ka thu hi ngaihven la, Ka thu sawi hi bengkhawn rawh. A bosan che phal suh la, i thinlungah vawng tlat ang che. A hmutute tân nunna a ni a, An taksa tân damna a ni,” tiin.  [Thufingte 4:20-22]

Pathian Thu duhnaa i ṭhanglian zel a nih chuan chu thutak chu i tan a pawimawh zel ang. I vawng reng a, i hmang chhuak a nih chuan i nun kha a thlak danglam ang. 

Ngaihtuah zui atan. 

Eng vangin nge Pathian Thu vawn ai chuan infiamna chanchin emaw ei in siamna hmanrua chhinchhiah chu a  awlsam zawk tlat fo? 

Engtin nge Pathian i hmuh dan chuan Pathian Thu i zir chakna leh vawn reng chakna chu a nghawng? 

Bible ngainatna chu i nei tehchiam lo a nih chuan, a Thu ngainatna thuk zawk nei turin Pathian chu dawr ang che? 

*I chatuan hmun khawiah nge i hman dawn?* 

I sualna chuan Pathian lak atangin a la hrang che a ni. Pathian khawngaihna chauh chu amah nena inlaichinna dik taka hung let leh theitu che chu a ni e. 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...