_Ni 40 Chhung Ṭawngṭaina_
- Rick Warren
- Sept 15, 2024
_"Tin, in ṭawngṭaiin, Jentailte angin sawi nawn mai mai suh u; an ṭawng tam avangin hriain an ring a ni. Chutichuan, anmahni angin awm suh u; amah in dil hmain in Pa chuan engte nge in mamawh tih a hre reng si a."_ (Mat. 6:7-8)
Rei tak kan ṭawngṭai avang hian kan ṭawngṭaina a chak ta zawk e tihna a ni lo.
Pathian chuan rei tak ṭawngṭaina aiin tlawm tak leh thinlung taka ṭawngṭaina a duh zawk. I sawi tum kha sawi tawp mai rawh!
Tlang chunga thu a sawiah khan Isua khan ṭawngṭaina chungchang a sawi a, rau taka ṭawngṭai lova, fel taka ṭawngṭai a sawi uar hle.
_"Tin, in ṭawngṭaiin, mi vervekte angin in ti tur a ni lo; miin an hmuh theihna `turin, inkhawmna inahte, kawtthler peng takahte, ding chunga tawngtai an ngaina si ṭhin a. Tih tak meuhvin ka hrilh a che u, an lawmman chu an hmu zo tawh. Nang erawh chuan i ṭawngṭaiin, i pindan chhungrilah lut la, i kawng khar la, i Pa aruka awm hnenah chuan ṭawngṭai rawh; tichuan, i Pa aruka hmu ṭhintu chuan a rul ang che. Tin, in ṭawngṭaiin, Jentailte angin sawi nawn mai mai suh u; an ṭawng tam avangin hriain an ring a ni . . . amah in dil hmain in Pa chuan engte nge in mamawh tih a hre reng si a._" (Mat. 6:5-8)
I mamawh hrilh hre turin Pathian rilru hneh tura i chham kher a ngai lo. A hre sa vek! A hmaah mawl takin, rilru dik tak puin, tlawm takin kun la, i mamawh chu thlen mai rawh.
Ṭawngṭaina hi intihtheih nan hmang suh. Mi tam tak, an ṭawngṭaina thu hmanga midangte hneh tum i hmuh ve fo ka ring. Mahse ṭawngṭaina thu mawi tak an chham avangin chhanna ṭha bik an dawng miah lo. Pathian duhzawng ṭawngṭaina a ni lo. A hnena thusawi ni mai lovin nangmah nena inbiak a ni a duh ni.
Chutiang ni lovin, thinlung leh tih tak zetin ṭawngṭai rawh. Duh thawh takin nawrna nen dil suh. I ṭawngṭaina a tawi viau dawna i hriat avang maiin ho mai mai chham tel kher suh.
I hmangaih emaw i ṭhian ṭha tak emaw i biak ang khan Pathian be rawh. Zingah kawngkapui i kan rualin, "Lalpa, ni duhawm tak a ni. Ni ṭha tak min pe a ka lawm e" tiin sawi la. Tichuan nilengin Pathian nen in inbiak chhunzawm thei, engnge i thawh, engah puihna i mamawh, engin nge tilawm che tih te Pathian hnenah i hrilh zel thei ang.
I ṭawngṭainaa thu i belh vak vak khan i ṭawngṭaina a tihawihawm phah miah lo. I ṭawngṭaina chu fel tak, thinlung tak leh rinna nen ni se.
Ngaihtuah zui atan.
Pathianin ṭawngṭai tawi fel leh thinlung taka ṭawngṭaina a duh tih i hriatin mite hmaa ṭawngṭai i awlsam sawt em? Engvangin?
Engvangin nge Pathianin thiam tak leh sei taka ṭawngṭai aia tlawm tak leh tih tak zeta ṭawngṭai a duh zawk ni a i rin?
Vawiin hian engin nge i rilru luah ber le? Pathian hnenah i hrilh tawh em?
[Lettu: Mapuia Fanai]
No comments:
Post a Comment