_Ni 40 Chhung Ṭawngṭaina_
By Rick Warren
— September 12, 2024
“Intlânsiaknaa tel tûrte chu kawng engkimah an insûm ṭhîn, chawimawina lukhum chhe mai thei hmu tûrin an bei a, keini erawh chuan chawimawina lukhum chhe thei lo hmu tûrin kan bei a ni.” [I Korinth 9: 25]
Mi tam ber ngaihdan chuan Tom Bradley-a chu a hnung [quarter back] lama khel tawh zingah chuan National Football League inelna pumpuiah a la ṭha berah an ngai. Kum 2021 khan Super Bowl-a vawi sarih champion thei zingah upa ber niin an ngai. Eng vangin nge a ṭhat em em ni ang?
A vanglaia Bradley-an a rilru, taksa leh ngaihtuahna pui tura a vanglaia a thiltihte chu, tui no 2 leh a chanve chu zinga a thawh rualin a in ṭhin a. Thil ṭha tih a ching a, chu chuan rah ṭha a chhuah ta a ni.
Thil ṭha tih i chin chuan i ṭhang ṭhin. Chu chuan i nun pumpui, thlarauva i ṭhanna, pawh a huam thei ang. Thil ṭha tih i ching a nih chuan, nungchang ṭha tak i nei ang a. Nungchang ṭha tak i nei a nih chuan, kawng zawh lai ṭha tak i nei a ni. I mizia chu i nungchang hrang hrang belhkhawmte chu an ni ang.
Bible chuan hetiang hian a sawi, “Chûng chu in hre ta a, in zawm chuan in lâwm ang.” [Johana 13: 17]
Thil tih tur dik i hriat vang chuan malsawmna i chang ngawt ngai lo. Thil dik i tih avang leh i nuna i lakluh chauhin Pathian malsawmna chu i dawng ṭhin. Thil chin ṭhan chu engtianga chin ṭan nge a nih? Tihnawn leh tihchhinin. Vawi tam tak zir chianna chuan thil eng pawh i tih apiang chu – taksa sawizawi a ni emaw, ei in thu hla emaw, thlarau nun a ni emaw kar ruk chhung tal nitin i tih a ngai a ni tiin an sawi.
Nitina Bible zir chu han ngaihtuah chhin teh. Ni eng emaw chen kalpui a, khaihlak leh rih emaw chu, vawi eng emaw zat chhunzawm lehin ni eng emaw han chawlhsan leh teh, chu chu thil chin ṭhan [habit] anga chhiar a harsa. Mahse nitin Bible zir tura i inbuatsaih a nih chuan, i nihna a ni thuai ang a, tichuan i thil chin ṭhan [habit] a lo ni zui ang.
Thil chin ṭhan [habit] ṭha tak i insiam a nih chuan, i dam chhung zawng nangma ṭhanna atan leh chak zelna atan i hmang thei tawh ang. Mi hlawhtlingte chu mi naran ve mai an ni fo a, mahse thil chin ṭhan [habit] ṭha tak an damchhunga an kalpui tur siamtute chu an ni ṭhin. I thil chin ṭhan [habit] chu nangma siam a ni a, i chin ṭhan [habit] chuan a hruai ang che.
Bible chuan hetiang hian a sawi: “Intlânsiaknaa tel tûrte chu kawng engkimah an insûm ṭhîn, chawimawina lukhum chhe mai thei hmu tûrin an bei a, keini erawh chuan chawimawina lukhum chhe thei lo hmu tûrin kan bei a ni.” [I Korinth 9: 25]
Thil chin ṭha [habit] i siamte chuan i thlarau nun chu a hruai zel ang a, chu chuan chatuan atan an buatsaih ang che.
Ngaihtuah zui atan.
Tun aṭanga kum khat hnuah, engtiangin nge thlarauva ṭhan len i duh? Eng thilin nge a thlenpui ang che? Kawng dik i zawh theih nan chu chu pen khat tetea indawtin han ziak chhuak teh.
A chang chuan hunbi leh beiseina te chu a tak tak rama chantir theih lohte an ni. Tun kar hian i thawh zawh vek nghal a ngai lo! Thlarau nunah chuan nitin, hun eng emaw ti chhunga tih char chara thlarau tana i ṭhanlenpui theih tur chu engnge ni ang?
Midang laka rinawmna chuan engtin nge thlarau nunah leh thil dang hrim hrimah a ṭhanlentir che?
[ *Lettu:* Peka]
No comments:
Post a Comment