_Ni 40 Chhung Ṭawngṭaina_
By Rick Warren
— Sept 27, 2024
“Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se.” [Marka 14:36]
Kraws kawng a zawh hma zan khan, Isua chu Gethsemane huanah a ṭawngṭai a nih kha. Sawisak a ni dawn tih a inhre lawk a, tuarna leh thihna chu kraws-ah a hmachhawn dawn tih pawh a hre bawk. Nang leh keiin tuarna leh natna hmachhawn kan huphurh tluk zet khan a ni pawhin a huphurh ve ngei ang.
“Hma lamah tlêm a va kal hlek a, leiah a bawkkhup a, chumi hun chuan amah a pelh mial theih nân a ṭawngṭai a.” [Mark 14:35].
Isua khan Pathianin khawvel chhandamna hna amah kaltlang a thawh kha kawng dang awm thei se chu chu hriat a duh ngei ang. Tichuan a Pa hnenah ṭawngṭaiin kawng sialsak turin a dil a nih kha. Chutianga a tih takah chuan, Isua kaltlang chuan chutiang tuarna chu kan paltlang ve kher duh tawh lo a ni tih Pathian hnenah kan hrilh hre thei ang.
Marka 14: 36 chuan, “Abba, ka pa, engkim i ti thei a, he no hi mi lâk sawnsak rawh; nimahsela, keima thu ni lovin nangma thu thu ni zâwk rawh se,” tiin a sawi.
Chu ṭawngṭainaah chuan, natna in neih changa ṭawngṭai dan tur kawng thum Isua chuan min kawhhmuh:
Pathian thiltihtheihna vuan rawh. Pathian hnenah chuan, “Ka Pa, engkim i tithei tih ka hria e! Engkim hi i tan chuan tihtheih a ni. He harsatna hi i chingfel thei tih ka hria e. He tuarna hmun aṭang hian min chhanchhuak thei tih ka hria a. He natna hi i la kiang nghal thei tih ka hre bawk. Lalpa, nang chu engkim titheitu i ni e,” tiin sawi ang che.
Tihtak zelin dil rawh. Pathian hnenah hetiang hian sawi ang che, “Ka pa, ka thil dilte hi khawngaihin min pe ang che! He natna leh tuarna hi la kiang ang che. Ka natna te i hmu a, min ngaihsak tih ka hria e. Ka ṭawngṭaina te min chhansak dawn tih pawh ka hria e. Khawngaih takin ka natnate hi min delhtir tawh suh ang che.”
Pathian ruahmanna pawm rawh. He thu hi hrilh ang che, “Lalpa, he tuarna hi ka paltlang duh tawh lo. Mahse ka duh ber chu i duhna tihhlawhtlin a ni, i ruahmanna, i hmathlir leh i thlirna te chu a pawmtu nih ka duh e. Tuarna a keng tel a nih pawhin ka nunah hian i duhna chu thlentir ang che. Ka hnenah i awm dawn a, min ṭanpui dawn a, nangmah ang turin min siam dawn tih ka hria e.
Chu chu ṭawngṭaina awlsam a ni lo, a bikin, tuarna hmunah chuan. Mahse chu chu Pathian chawimawhna leh chhanna dik a ni ngar ngar ang.
Ngaihtuah zui atan.
Eng vangin nge Pathian thiltihtheihna rinchhan chunga ṭawngṭai chu a pawimawh nia i hriat?
Tih tak zeta ṭawngṭai chu eng vangin nge a pawimawh?
Thil dang zawng zawng aiin Pathian duh zawnga nun chu i duh zawk thei ang em? Eng vangin nge?
[ *Lettu:* Peka]
No comments:
Post a Comment