_Min Tidanglam Ta_
- Rick Warren
- July 28, 2024
_"Pathian chuan hlauhna leh zahzumna thlarau min pe lova, thiltihtheihna, hmangaihna leh mahni inthunun theihna thlarau min pe zawk a ni."_ (II Timothea 1:7, NLT)
Pathian chuan mi zawng zawng nen inrem a awm turin a duh che. Engvangin? A chhan chu, buaina chinfel loh hian kan nunah nghawng ṭha lo tak pathum a neih ṭhin avangin.
A hmasa berah chuan, Pathian nena in inpawlna a daidang a ni. Midang nen inrem taka in khawsakho theih loh chuan, Pathian nen pawh in inrem thei lo. Midang nen in buainain i rilru a lak pen chuan, Pathian nena inzawmna tak tak in nei thei lovang. Bible chuan, _"Miin, 'Pathian ka hmangaih e,' tiin a unau haw si se, mi dawthei a ni; a unau a hmuh phâk reng pawh a hmangaih loh chuan, a hmuh ngai loh Pathian chu engtin nge a hmangaih theih ang?"_ (I Johana 4:20) a ti.
A dawt lehah chuan, buaina chinfel loh hian i ṭawngṭaina a tibahlah. Buaina, sualna leh inremlohna ten i nun a khah chuan i ṭawngṭainain van a thleng lovang tih Bible-in a sawi nawn lawm lawm a ni. _"Pathian laka tihrangtu che u chu in sualna hi a ni. In sualna avangin a hawisan che u a, a ngaithla ngai lovang che u."_ (Isaia 59:2, NLT)
A pathumnaah chuan, buaina chinfel loh chuan i hlimna a tichhia. Hlimna leh inremlohna hi a thleng rual thei lo. Kawngkapui aṭanga buaina a lo luh tawh chuan hlimna chu kawngka hnung lamah a chhuak daih ṭhin.
In inlaichinnaah buaina a lo thlen tawh chuan, amahin a kal bo thei ngawt lo. Haider, hnawl leh khawiah emaw hnawl bo daih emawin buaina chu i tibo thei hauh lo.
"Hunin na a tuam dam ṭhin" an tih hi i hre ngai em? Thudik a ni hauh lo. Hun hian engmah a tidam lo. Hun hian engkim dampui dawn se doctor i hmuh a ngai lovang. Hliam i neih a i enkawl vat loh chuan a pûn thuai ang. Chutiang chiah chu buaina hi a ni. Thinrimna hi huatnaah a chang a, huatna chu khâknaah a chang ṭhin.
Chuvangin buaina chingfel tur chuan i enkawl a ngai a ni. Midangin an puih hun che nghak suh. Buaina i neihpui mi hnenah khan kal la, remna siam turin a bul ṭantu ni rawh.
Mi huaisente chauhin buaina chinfel an tum ṭhin. Huaisenna i lantir theih dan sang ber chu hun rei tak chhung harsatna i lo haider tawh kha a ni thei - in nupa karah emaw, i fate nen emaw, i hnuaia thawkte emaw i pu te emaw, tu pawh an ni thei.
Khawiah nge harsatna hmachhawn tura huaisenna chu i hmuh ang? Pathian hnen aṭangin.
2 Timothea 1:7-ah chuan heti hian kan hmu, "_Pathian chuan hlauhna leh zahzumna thlarau min pe lova, thiltihtheihna, hmangaihna leh mahni inthunun theihna thlarau min pe zawk a ni."_ (NLT). Pathian Thlarauin i nun chhung khat la, thiltihtheihna, hmangaihna leh mahni inthunun theihna thlarauin i lo khat ang. Pathian hmangaihna chuan hlauhna te hnehin buaina chingfel turin a pui ang che anga, in inlaichinnaah damna a rawn thlen ang.
Ngaihtuah zui atan.
Vawiinah hian buainain i nunah eng nghawng ṭha lo nge a neih?
Vawiinah hian buaina chingfel turin eng angin nge hma i lak ang?
Pathian Thlarauva i nun chhuh khah tih hi engnge a awmzia?
[Lettu: Mapuia Fanai]
No comments:
Post a Comment