_Hun Rei Daih Thil Ngaihlu Tura Nun Buatsaih_
- Rick Warren
- June 23, 2024
_"Chutichuan kan zain Pathian hnenah mahni chanchin kan sawi theuh tur a ni. Chuvangin I insawisel tawh suh ang u, tupawhin mahni unau dalna emaw tlukna emaw siam loh tum zawk rawh u."_ (Rom 14:12-13)
Mi tam tak, Kristiante zingah ngei pawh, an ngaihdan kan ṭawmpuite chungah chauh zahna kan lantir tur a ni tih ngaihdan nei an awm. Engmah hi thudik lak aṭangin a hla thei tak tak lo! Tunlai khawvelah hian thil tam tak, keimah ngei pawh hian ringtu ka nihna zawn aṭanga ka pawm hauh loh tam tak a awm.
Mahse an nungchang a dik lo a ni tih hre reng chung pawhin zahna kan la lantir tho.
Engvangin?
A hmasa berah chuan, mimal tin hian kan nungchang, kan thiltih leh kan rilru puthmang chungchangah Pathian hmaah mawh kan la phur dawn a ni. Engtik niah emaw Pathianin ro a la rel ang a. Mahni chanchin ṭheuh kan la sawi ang.
A pahnihnaah chuan, Pathian ka ni lo. An ngaihdan ka ṭawmpui loh mite pawhin ka lakah mawhphurhna an nei lo. Pathian lakah mawhphurhna an nei zawk. Ringtu ni lo te ringtu anga awm tura hrilh kual hi ka hna a ni lo. Bible chuan miin Pathian nena inzawmna nun an neih tak tak hma loh chuan Pathian duhzawng angin an che thei lo tih a sawi.
Bible chuan heti hian a ti, _"Chutichuan kan zain Pathian hnenah mahni chanchin kan sawi theuh tur a ni. Chuvangin I insawisel tawh suh ang u, tupawhin mahni unau dalna emaw tlukna emaw siam loh tum zawk rawh u."_ (Rom 14:12-13). Midangte hnena thudik sawi hi intehna a ni lo. Bible-in thil dik lo ti a a sawi miin a lo tih a, a dik lohzia hriattir hi insawiselna a ni lo. Midang hnena thudik sawina mai a ni. Thudik hmanga mite vuak chat chat erawh kan chungnung zawk ni awm taka lantirna a ni a, inbûkna ṭha lo a ni.
Pawmpui theih miah loh mi ni lo chungin midangte i pawmpui lo thei. Tlang takin han sawi ila, mi chaltlai tak tak ka tawn ṭhenkhatte chu kristian thikthu chhe tak tak, midangte ngaihtuahna reng reng nei lo mite an ni.
Thil dik zawk i hria a ni mai thei, mahse midangte hnenah thudik pawh nise hmangaihna nen i sawi loh chuan Bible sawi angin i ti lo tihna a ni. A harsat em em lai pawhin Isuan midangte chunga zahna lantir tura min tih angin ke pen i tum tlat ang u.
Ngaihtuah zui atan.
Midangte sualna tarlang turin eng hun nge dik ber?
Engtinnge ṭawng tam lova ngaihthlak tam zawk hian mite zah kai tura a puih che?
Mi, an ngaihdan i ṭawmpui loh avanga a chunga i chet dan mawi lo avang khan ngaihdam i dil a ṭul em? Vawiin hian engtinnge i tih ang?
[Lettu: Mapuia Fanai]
No comments:
Post a Comment