Tuesday, June 25, 2024

PATHIANIN A NGAIHDAM CHE AVANGIN NGAIDAM VE RAWH

_Hun Rei Daih Thil Ngaihlu Tura Nun Buatsaih_

-  Rick Warren 
-  June 25, 2024

“Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u.” (Ephesi 4:32)

Tute pawh hi tihnatin kan la awm vek dawn. Miin kan chunga an thil sawi emaw an thiltih avang tein kan na thin a ni. Dik tak chuan, ‘ngaihdamna’ tih thu kan hriat apiangin hun liamta a kan natnate kan hasatnate kan hrechhuak thin a ni. Hmanni lawka thil thleng ang mai khan kan hre thin a, a chhan chu kan na kha a nat em vang a ni. 

Hrehawm taka min siam avangin, min tinatu chu ngaihdam harsa kan ti thin a ni. Mahse Bible chuan ngaihdam a tulna chhan pawimawh tak pakhat min hrilh.

Pathianin min ngaihdam avangin mi dang kan ngaidam tur a ni.

Bible chuan Ephesi 4:32 ah, “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” min ti a ni. Pathianin engzat chiahin nge a ngaihdam che tih i ngaihtuah chuan, a tinatu che chu i ngaihdam lehzual a ngai zawk maithei a ni.

A thu ep chiah pawh hi a dik hle. Ngaihdam nia kan inhriat loh chuan mi dang ngaihdam pawh a harsa kan ti viau ang. Mi dang ngaihdam harsa i tih viau chuan ngaihdam ni a in la inhriat chiah loh vang pawh a ni maithei a ni.

Hetiang hian ngaihtuah teh: Isuan krawsa min thawhsak tawh avangin kan sual zawng zawng chu Pathianin a nawt reh vek tawh a ni. Pathianin a ngaihdam che avangin i bat tlak tur zawng zawng pawh rulh i ngai dawn ta lo a ni. Chu rilru chu i vawn reng chuan, mi dang an sualna avanga ngaihdam loh chu harsa i ti viau ang.  

Hei hi hre reng rawh: Eng ang pawhin miin i chungah thil lo tisual se, Pathianin a ngaihdam che aia nasa chuan i ngaihdam a ngai dawn lo. 

Mi dang ngaihdam i hreh viau a nih chuan i nunah huatna te, khakna te, hrehawm tihna te leh rilru thawpikna te i nei nasa viau ang.  Nimahsela ngaihdam i nih tawh ang chiaha mi i ngaihdam ve chuan, i rilru natna te chu Pathian thlamuanna leh chawlhhahdamna hmang chuan i thlak thei ang. 

Ngaihtuah zui atan

* Ngaihdamna tih i hriat hian i rilruah engnge awm? Mi tu emaw ngaihdam tul viau ta se engtin nge i tih ang?

* Ngaihdamna tih awmzia chu i chunga thil lo thleng i theihnghilh tur a ni tihna a ni em? Engvang nge, eng nge a chhan?

* Pathian hnenah a ngaihdamna avang hian engtiangin nge vawiin hian lawmthu i sawi ang?

*Khawiah nge i chatuan hmun i hman dawn?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.
“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu : Sangpuia]*

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...