Tuesday, June 11, 2024

PATHIAN LEM I SIAM CHUAN, I TAWPNA PAWH CHUTIANG MAI CHU A NI DAWN A NI

Hun Rei Daih Thil Ngaihlu Tura Nun Buatsaih

Rick Warren
11th June, 2024
‘”Chûng siamtute chu chûng ang chuan an awm ang; A ni, chûng ringtu apiangte chu.” SAM 115:8

Nimin lamah khan mitin hian eng/tu emawah rinna kan nghat theuh tih ka sawi tawh a. Thil tha deuh deuh - chhungkuate, theihna te, Kohhrana kan rawngbawlna te thleng hian pathian lemah kan chhuah theih vek mai.

Pathian nilo thildangah rinna kan nghah hian kan nunah a chhe zawnga nghawng nasa tak a nei thin. Midang nen emaw, kan thiltih eng emaw hian min tifamkim niin kan hre mai thei, mahse beidawnna thuk takah kan in hnuklut mek a ni. Hemi chungchang hi Jeremia 10:14 ah chuan, "'Mi tin an mâwl a, hriatna an nei lo; Rangkachak chhertu pawhin a lem chher chu a zahpui a; A milim chhûn chu dâwt mai a ni si, Anmah niah thaw pawh a awm lo" a ti a. 

Amaherawhchu, kan eizawnna, midang nen inlaichinna, kan bank account thleng hian chutiangah chuan kan chhuah fo. Heng thil siamchawp te hian kan nunah awmzia min siaksakin kan ngai tlat thin a ni.

Chutianga kan tih chuan, kan hlawhchhamna kawng kan insiam mai a ni. Bible chuan, "Vut chauh a ei ṭhîn a; a thinlung buma awm chuan a nunna a inchhanhim theih lohna tûr leh, “Ka kut ding lamah hian dâwt a awm lo vem ni?” a tih theih lohna tûrin amah chu a pêntîr ta" a ti a (Isaia 44:20).

Aw, ni e, chung zawng zawng chu pathian lem, dawt vek an ni. Vanduaithlak takin, chung pathian lemte chuan min tih beidawnnaah an tawp mai lova. An bawihah min siam thin.

Sam 115:8 chuan, "Chûng siamtute chu chûng ang chuan an awm ang; A ni, chûng ringtu apiangte chu" a ti a. I nuna i ngaihhlut ber chu eng pawh nise, chutiang chu i ni dawn tihna a ni. Sum i ngaihhlut ber chuan, khawvel thil ngai hlu tak i ni ngei dawn a. Nawmsakna i ngaihhlut chuan, tisa thil lawm mi i ni dawn a. Hnathawh atchilh mi i nih chuan, thil tangkaina nei chauh ngai hlu mi i ni ang. Chung zawng zawng aia Isua i dah hlut chuan, Kristian i lo ni ang.

Chutianga kan nuna kan dah hmasakin min tidanglam thin a nih si chuan, engatinge chutiang chu kan tih reng si?

Pathian kan thunun theih kan duh a. Kan enkawl theih nise kan duh a ni ber mai. Sum hi kan pathian a nih chuan, kan thuhnuaiah kan dah thei niin kan hria a. Mihringte kan pathian a nih chuan, kan thuhnuaia dah theih thovah kan duh a. Kan awm a tinuam a ni ber mai.

Mahse Pathian erawh kan thunun thei lo. A ni chuan, "Min tihniam tum suh u. In nunphung mil khan min awmtir tum hek suh u. Min thunun tum reng reng suh ang che u" a ti zawk a ni.

Chung ai chuan, amah chu ring la. I thunun theih thilte kalsan a, zalenna hmuin, Pathian chu i nunah a hmasa berah dah chungin i nun awmzia lo zawng hmu zawk ang che.

Ngaihtuah zui atan...

Pathian hnena in hlanna ah hian engvangin nge zalenna a awm si?

Engvangin nge thil tha tak takte pawh pathian lemah an chhuah theih?

Engthil i nunah pathian lema i chhuah lohna turin i thuneihna atan i chhuah ngai awm le?

(*Lettu*: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...