Saturday, June 1, 2024

I THIL TAWN TAWH: A CHHIA A ṬHATE KHA PAWM TLAT RAWH

_Thil Tidanglam Tura Hrual_

- Rick Warren 
- June 1, 2024
_"Pathian nena thil tam tak in pal tlang aṭangte a Pathian nihna in tawnhriatte kha hre reng rawh u"_ (Deut. 11:2, GNT)

I hun kal tate thil ṭha atan Pathianin a hman i duh em? Anih chuan i thil tawnte- a ṭha, a chhia, a zahthlak, a dik, dik lo, hlimawm leh hlimawm lohte  i pawm thiam a, i hun kal tate i tlansan loh a ngai a ni.

Galatia 3:4-ah chuan heti hian kan hmu, _"I thil tawn zawng zawngte kha a thlawn mai em ni? Anih loh ka beisei!"_ (NCV)

I hun kal tawhte tlan liamsan tum mai mai suh. An tawrh nat em avangin mi tam tak chuan an hun kal tawh an pawm lo a, an ngaihthah a, an hlut lo a, an inchhir a, an haw em em a ni. An hun kal tawh chhui kirin dawtin an sawi danglam a, a chhan chu nat reng ai chuan an hlimna anih ringin dawta nun an duh zawk hial. Mahse i pawm loh chuan Pathianin i hun kal tate kha thil ṭha atan a hmang thei hauh lo.

I nuna i thil tawn zawng zawngte kha Pathianin thil ṭha atan a hmang thei, mahse chung chu tlan chhiatsan tawh lova pawm i zir a ngai. I nu leh pate khan an ngaihsak viau lo che a ni thei, zirna lamah i hnufual deuh pawh a ni thei, in sikul football team-ah captain i ni kher lo thei. Anih chuan engnge? I thiltawn hlu takte an ni. Neitu thinlung pu rawh.

I rilru aṭanga i thil tawn ṭha lo tak takte dah bo i tum kha bansan la. Hre reng zawk rawh. Deuteronomy 11:2-ah chuan heti hian kan hmu, _"Pathian nena thil tam tak in pal tlang aṭangte a Pathian nihna in tawnhriatte kha hre reng rawh u"_ (GNT)

Heti hian a sawi theih bawk, i tawnhriatten zirlai ṭha tak an pek che kha theihnghilh suh. Engtinnge chutiang chuan i tih ang? I thil tawnin zirlai ṭha tak an pek che hriat reng theih dan tur chu ziaka dah hi a ni. Nitin chanchin ziakna (diary) hi ka sawi lo. Diary chu nitina i thiltih ziah luhna mai a ni: "Vawiin chuan dawrah bawnghnute ka lei" tih ang chi te. Thil bik ziahna (journal)-ah chuan nitin i ziak kher lo. Mahse zirlai ṭha tak i zirin i theihnghilh loh nan hetiang hian i ziak zel ang: "He ka thil tawn hi a na hle mai. Harsa takin zirlai ka zir a ni. Theihnghilh ka duh hauh lo."

Pathian nihna i tawnhriat aṭanga i zirte i theihnghilh loh nan ziak zel rawh. Tichuan Pathianin engnge a zirtir che tih keu letin i en thei ṭhin ang. Hun khirh tak i tawn laiin i tana ṭha turin Pathianin a thawk zel a ni tiin i infuih thar thei ang.

Ngaihtuah zui atan.

Engtinnge i chungah Pathian a rinawm a i ṭawngṭai a chhang a ni tih hre reng turin i tih ang?

Ziaka i chhinchhiah lo anih pawhin i zirlaite hre reng tura dah ṭhat dan kawng dang engnge awm?

I thiltawn tawh Pathianin thil ṭha atan a hman theih nan i tawnhriat engnge i pawm reng tur?

*Vawiin hian Isua i zui dawn em?*

Pathianin a Fapa Isua Krista kaltlangin a ṭhatzia a lantir tawh a. Bible chuan heti hian a ti, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ 

Pathianin chatuan nun pek a tiam chang tura amah ring turin i inpeih em? I inpeih chuan heti hian ṭawngṭai rawh le:
"Lalpa, Isua Krista hi i Fapa a ni tih ka pawm e. I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...