_Thil Tidanglam Tura Hrual_
- Rick Warren
- May 19, 2024
_"Thilpêk hrang hrang a awm a, Thlarau erawh chu a thuhmun a ni. Rawngbâwlna chi hrang hrang a awm a, mahse Lalpa chu a thuhmun a ni. Hnathawh dan hrang hrang a awm a, mahse mi zawng zawnga thawktu Pathian chu a thuhmun a ni."_ (I Korinth 12:4-6)
Pathianin danglam takin a siam che a ni tih i hriatthiam hunah chuan eng ti tura siam nge i nih i hria ang. Siam i nih chhan i inhriat chuan i nunah i insawrbing thei ang a; tin, he khawvela Pathianin hun a pek che chu ṭangkai takin i hmang thiam tawh ang.
Thlaraua rawngbawl tura ke i pen a Isua hnung i zui chiah khan heti hian i sawi thei ang, "Pathian duh danin ka kal ang, ka duh dan ni lovin. Ka nun ka kaihhruaitir dawn a ni. Ka tum ni lovin Pathian thiltum chu ka zui anga. Duan leh siam ka nih chhan chu ka tihlawhtling dawn a ni."
Chulam kawnga ke i pen chuan, Pathianin thilpek lian tham tak pali a pe dawn che a ni:
*Ngaihdamna:*
_"Thilthlâwnpêk erawh chu bawhchhiatna nên a inang lo. Khâ mi pakhat thil sual tih avâng maha mi tam tak an thih si chuan, Pathian khawngaihna leh mi pakhat Isua Krista khawngaihna avânga thilpêk chu, mi tam zâwk chungah nasa lehzualin a awm ngei ang."_ (Rom 5:15). Isuan a tih hmasak ber chu i sual zawng zawng nawhreh a ni. Ngaihdam a ni tawh! Thiamloh channa a awm tawh lo.
*Chatuan nunna:*
Pathian chuan i tan ruahmanna lian tak a nei a ni. Rom 6:23 - ah, _"Sual hlawh chu thihna a ni a, Pathian thilthlâwnpêk erawh chu kan Lalpa Krista Isuaah chuan chatuana nunna a ni."_ tih kan hmu. Vanram kal hi i thawh leh hlawh chhuah theih a ni lo. Vanram i kal theihna awmchhun chu rinnaa Pathian thil thlawnpek i lo dawn kha a ni.
*Thlarau Thianghlim:*
Rom 5:5-ah chuan heti hian a ti, _"Keimahnia Thlarau Thianghlim min pêk hmang hian kan thinlungah Pathian hmangaihna a chhûn luh tawh avângin, beiseina chu a tithlâwn dâwn si lo va."_ tiin. I nunah Pathian i laltir a ni tih engtinnge i hriat? Thlarau rah nangmaha a awmin: hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, zaidamna te leh insumtheihna te.
*Thiltihtheihna danglam bik:*
Bible-ah chuan heng thiltih theihna danglam bik te hi thlarau thilpek a ni, thilpek kan hmuh theih te laka danglam bik chu. Pathianin ti tura a tih che ti thei tura theihna i mamawh chu. Ringtu tam tak te hian thlarau thilpek an dawng tih pawh an inhre lova, engnge a nih pawh an hre lo. Mahse, i nei a ni.
Bible chuan I Korinth 12:4-6 ah chuan, _"Thilpêk hrang hrang a awm a, Thlarau erawh chu a thuhmun a ni. Rawngbâwlna chi hrang hrang a awm a, mahse Lalpa chu a thuhmun a ni. Hnathawh dan hrang hrang a awm a, mahse mi zawng zawnga thawktu Pathian chu a thuhmun a ni."_ a ti.
Engnge Thlarau thilpek chu? Pathianin i nunah thiltum a nei a, chu a thiltum tihhlawhtlinna tura hmanrua te chu Thlarau thilpek an ni. Theihna a pekah che chauh lo chuan Pathianin eng thil mah ti turin a ti ngai lovang che. Krista i pawm chiah khan pek i ni.
I thilpek dawn tur i thlang thei lo. I hlawhchhuak bawk lo. I hlawkna tur pawh a ni lo. Midangte i ṭanpui nana Thlarau thilpek chu pek i ni zawk. Tin, Kohhrana midangte kha nangmah ṭanpui tura thilpek pek an ni ve bawk.
Entirnan, mi ṭhenkhatte chu midangte rawngbawlsak chi an ni a, ṭhenkhatte chu thilphal thilpek pek an ni. Zirtirtu ni tura theihna pek an awm a, ṭhenkhatte erawh hruaitu ni tura pek an ni thung. Hengte hi Thlarau thilpek entirna ṭhenkhat te chauh an ni.
Zirtirna Thlarau thilpek ka dawn ka hman chiah khan malsawmin in awm ṭhin. I Thlarau thilpek dawn i hman khan Kohhran mi te malsawmin an awm ṭhin. Thil remkhawm chi ang hi a ni. A them pakhat i tihbo hlauh khan engnge i hriat chhuah hmasak ber? A bo bera kha a ni lo'm ni? Thlarau thilpek kan dawn te kan chhawm nuna kan hman chuan malsawmin kan awm ṭhin.
Ngaihtuah zui atan.
Heng thilpek hlu tak kan sawi tak- ngaihdamna, chatuan nunna, Thlarau Thianghlim, leh theihna bik te hian engtinnge ringtu in nihna anga i nunah danglamna a thlen?
Eng thlarau thilpek dangte nge Pathianin a pe che ni a i hriat? Entir nan, zirtir theihna emaw, hruaitu ṭha midangte huikhawm thiamna pek i ni em? Chhiahhlawm rilru ang pu inngaitlawm mi i ni an ti mai thei bawk. Rom 12:6-8; 1 Kor. 12:8-10, 28-30 leh Ephesi 4:11 te kha han chhiar teh.
Engtinnge thlarau thilpek i dawn te kha in kohhrana midangte malsawm nan i hman dawn?
*Pathian thil thlawn pek dawng turin i inpeih em?*
Pathianin ngaihdamna leh chhandamna a thlawnin min pe a. Chu a thilpek chu i dawn phawt chuan amah leh midangte rawng i bawl theih nan thlarau thilpek a pe ang che. Chung thilpekte chu dawng tura i inpeih chuan heti hian ṭawngṭai rawh le:
"Lalpa, thil ka lo tihsual tawh zawng zawng min ngaihdam avangin ka lawm e. Ka duhnaah ka kal a, mahse tunah chuan i khawngaihnaah ka rinna ka nghat e. Ka sualte min ngaidam turin ka ngen a che.
Vawiin hian Isua Krista ka tana a inpekna zara chatuan nunna a thlawna min pek chu ka pawm e. Vanram hi ka hlawk chhuak thei hauh lo tih ka hria. He Thlarau thil thlawn pek hi ka pawm e. Ka nunah lo cheng la, i hmangaihna, hlimna, muanna leh dawhtheihnain min vur ang che.
Lalpa, ka nuna thil bîk, thlarau lama theihna min pek hi ka pawm e. Hmu chhuak a, i tana hmang a, puntir a, min siam anga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment