_Thil Tidanglam Tura Hrual_
- Rick Warren
- May 20, 2024
“Krista Isuaah chuan thil ṭha ti tûrin min siam a, a kut chhuak ngei kan nih tâk hi, thil ṭha tih chu kan awm dân tûra Pathian buatsaih lâwk a ni.”
Ephesi 2:10
Hlutna i neih nachhan chu Pathianin i chungchang a sawi vang a ni a, mi dangin an sawi dan che vang pawh a ni lo.
Mi tam tak chuan mahni inzahna hi an tlachham a. Mahni an inngaih dânah an ngaih a tha tawk lova, a chhan chu an thawmhnaw hak te, an lirthei te, an thusawi te hmanga intih that an tum thin vang a ni. An nihna an inpawm tawk loh avangin an rilru nawmna turin theihtawp an chhuah zel a - chu chu Pathian laka helna a ni.
Pathian hian mi dang ni turin duh che sela, i awm/piang lovang. Mahse nangmah ni tur khan a duh che a. Nangmah ni turin a siam che a ni. Ringtu kan nih angin mahni inzahna hi kawng thumin kan hre thei:
1. Pathianin a siam che.
2. Isua i tan a thi.
3. Pathian Thlarau nangmahah a awm.
Isua chuan, “Krista Isuaah chuan thil ṭha ti tûrin min siam a, a kut chhuak ngei kan nih tâk hi, thil ṭha tih chu kan awm dân tûra Pathian buatsaih lâwk a ni" (Ephesi 2:10) a ti a. Thuthlung Thar bu hi Greek tawnga ziah a ni a. Greek tawng chuan thilsiam tha em em mai hi poema an ti a. Chumi atang chuan "poem" tih hi a lo chhuak a ni. Pathian chuan, "Ka poem i ni a. Ka kutchhuak mawi leh tha tak chu i ni. Mi dang lachhawng turin ka duh lo che a. Nangmahah khan thilpek ka dah a - thlarau thilpek te, thinlung te, theihna te, mizia te, thil tawn tha tak takte - tichuan chung chu hmang tangkai turin ka duh che a ni" a ti. Pathianin a sawi dan che avang leh i tana a tihsak che avangin hlutna i nei a ni.
Duh i ni mai lova. Mamawh i ni. Bible chuan 1 Korinth 12:4-6, “Tin, thilpêk chi hrang hrang a awm a, chûng chu Thlarau pakhata mi a ni. Rawngbâwlna chi hrang hrang pawh a awm a, Lalpa pakhat tân a ni; thiltihtheihna pawh chi hrang hrang a awm a, Pathian pakhat hnêna mi a ni, mi tin hnêna thiltihtheihna pe ṭhîntu chu" a ti.
Mamawh i ni a. Kohhranah mamawh i ni a. Khawtlangah mamawh i ni a. He khawvelah hian mamawh i ni a. Mamawh ni lo ta la chuan, Pathianin a siam lovang che. I nuna thil tih neih ve a duh avangin a siam che a ni.
Pathian chhungkuaah chuan mi te an awm lo. Mitin, Pathian chhungkua a mi zawng zawng hi tul tak an ni vek. Ka inchhunga eng pawimawh ber engnge i hria em? Chaw eina pindan a eng lian tak tarmawi (chandelier) a ni miah lo. Eng te tak te, zan ka harh apianga ka tih en thin kha a ni. Khami avang khan ka ke ka chhuih nat loh phah thin a ni.
Eng mawhphurhna pawh hi a pawimawh a. Pathianin a sawi miau che avangte, man to tak mai a fapa tira i nun a chhana a fapa Isua krosa a thih avangte khan hlutna i nei a ni.
Pathian thilsiam tha chungchuang tak i ni a. Le, kal la, chumi chu inpawm chungin i nun hmang ang che.
Ngaihtuah zui atan...
Pathianin i chungchang a sawi aia mi dangin an sawina che i ngaih pawimawh zawk tum a awm em?
Isua i hnaih khan mahni i inngaihhlutna kha a pung ve zel em?
Kohhranah eng mawhphurhna nge i neih? In khawtlangah te? He khawvelah hian? Chung chu engtin nge i tih hlawhtlin thin?
(Lettu: Msa)
No comments:
Post a Comment