Thil Tidanglam tura hrual
By Rick Warren
— May 23, 2024
“Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang.” [Thupuan 3:20]
Pathian chuan a thinlung a pe che a, tichuan nangmahah phurna, tuina leh duhthusam [dreams] a dah bawk. Mahse, chungte chu a thuneihna hnuaia dah an nih loh chuan hmansual an niin tihkhawloh an ni thei a, tha lo taka hman an ni thei a, kawng dik lo lam hawipui theih a ni a, i nunah chung chu tlakral mai mai an ni hial ang.
Khawvel pumpuiah hian mi maktaduai tam takte chu an tuina, an suangtuahna leh thiltumte chu kawng dik lo lama hmang sual an awm. Chu chuan Pathian thinlung a tikeh a ni. Chuvang chuan, theihna leh phurna nasa tak an nei chung pawhin mi tam takte chu an hlim thei tlat lo. I phurna chu a dik lo zawnga hman a nih chiah chuan, a tikhawlo vek che a ni.
Thenkhat chuan, “Thil engmah tak takah hian tuina ka nei love” in ti mai thei. Chu chu a awmzia i hre turah ka ngai, i hria em? A awmzia chu Pathian nen inzawmna in nei lo tihna a ni. Pathian nena inzawmna nei chungin phurna nei miah lovin i awm thei lo. Pathian nena inzawmna in nei a nih chuan, thahrui chak tak [220 volts] zawm ang vel i ni ang. Phurna i nei ang!
Pathian chu thatho taka che thin, phurna nei a ni. Phurna i neih chhan chu ama hlimthla din i nih vang a ni. Pathian chuan chatuan daih hmangaihna chuan a hmangaih che. Thil eng emaw avanga amah I hnawl changte chuan a thik ve hial thin che a ni. Mahse thil eng pawh lo ti tawh la, a hmangaih tlat ang che! Chu chu a thathona chu a ni!
Pathian nena nitin fianrial hun hmanga amah i zawm a nih ngat chuan phurna i nei lo thei lo ang. Pathianin khawvel a hmangaih ang chuan i hmangaih ve bawk ang a. Ama thlirna ang chuan thil i thlir hret hret bawk ang. A chhan chu tu emaw i kawm tam ber mil chuan i awm zel ang.
I nunah khan chakna tam zawk neih i duh em? Phurna nasa zawk? Nun zuanzang zawk? A neih theihna hmun ka lo hrilh ang che. Thathona [enthusiasiam] tih thumal chu Greek tawng atanga lo kal a ni a, en leh theos atangin – en chu chhungah tihna niin theos chu “Pathian” tihna a ni thung. En leh theos tih chu i nei a nih chuan phurna [enthusiastic] chu i nei em em ang.
Pathian i hnaih deuh deuh ang zelin chakna, hlimna leh phurnate i hringnun hman mekah chuan i nei tam zel ang. Pathian i hlat a nih thung chuan nun ning leh phur lo zetin hun i hmang tam tial tial ang.
Mahse Pathian tana i thinlung hawn chu duhthlanna innghat a ni. Thupuan 3: 20-ah chuan hetiang hian Isua chuan a sawi, “Ngai teh, kawngkhâr bula dingin ka kik hi, tu pawh ka aw hriaa kawng mi hawnsaktu hnênah chuan ka lût ang a, zanriah ka ei ang a, ani pawhin ka hnênah a ei bawk ang,” tiin.
Isua chuan i nun kawngkhar bulah chuan dingin rei tak chhung chu a kik ta a. Mahse amah chu pa hawihhawm tak a ni thung. A rawn nam hawng rawk dawn lova. Nangmah zawkin i hawn a ngai ang.
Ngaihtuah zui atan.
Nitina i khawsakpui leh i thiltihpui thinte chuan i Pathian ngainatna an tipung deuh deuh nge an tikiang zel zawk?
Eng thilah nge phurna i lo neih? Engtiangin nge chutiang phurna chuan Pathian ropuina an thlen thin?
Nitin fianrial hmang thei turin engtiangin nge i nitin nun hman dan thenkhat chu thlak danglam a ngaih?
[ *Lettu:* Peka]
No comments:
Post a Comment