Friday, May 10, 2024

I PEK TUR CHU PATHIANIN HRILH CHE RAWH SE

_Rinna Huaisen_

- Rick Warren
- May 10, 2024
”I sumin Lalpa chawimawi ṭhîn la, I neih pung hmasate nên chuan.“
‭‭Thufingte ‭3‬:‭9‬ ‭

Rinna nei mi i lo nih chuan, Pathianin pe tura a tih ang chein pek nachang i lo hre tawh ang a. "Hei hi a mawi tawka ka pek theih chu niin ka hria" i ti tawh lovang. Chutianga pek chuan rinna a mamawh lo.

Chu ai chuan, "Keimah kaltlang hian engnge pek i duh?" tiin Pathian zawt la. Hmu thei chunga pek leh hmuh theih loh chung pawh a pek hi a dang a ni.

Ka nupui Kay-i leh kei hian hetiang hian kawng tam takin fiahna kan tawk tawh a. Entirna pakhat chu 1993 kuma Saddleback kohhran tana inkhawmna hmun sak tuma sum kan tuak tum kha a ni. Kum thum chhung zet mite hnenah thilpek pe tura rilru siam turin kan ngen a. Kay-i leh kei chuan kan pek tur chungchang tawngtaiin kan dil a, kan sum lakluh nena inmil lo tak mai zat zet pek kan ti tlu a. Kan ngaihdan chuan kan theih phak bak a ni. Mahse Pathian kutah kan dah tawp mai a ni.

Ni engzat emawah chuan 1 Chronicles 29, Pathianin Lal Davida hnenah temple sa tura a thilpek puang tura a tih chu mi dang pawhin anmahni ang bawkin a inseng nasa tih thu ka chhiar a.

Mi dangte chona atan Pathianin ti ve turin min duh niin ka hria a. Ka tum chu miten an ngaisual ang tih ka hlau hle a. Mahse ka ti ta thova. Kohhrante pawh min tawngtaipui turin ka sawm a ni

A thla lehah chuan chawlhkar tawp, thilpek kan lakkhawm hun ṭurn a rawn thleng a. Engtin nge kan tih ang aw tiin kan ngaihtuah a. Chumi kar tawp hma zirtawpni chuan Zondervan Publishing Company hnen atangin min rawn bia a, lehkhabu Purpose Driven Church tih ziak tur leh chumi atana pawisa tur pawh ka ziah hma hauhin min pek lawk an inhuam thu min hrilh a. Kan tiam zat chiah kha a ni.

Pathian hi i hneh ban thei lovang!

Kohhrante hnena chu thu ka sawi meuh chu ka nuna ka thil tawn ropui  ber zinga mi a ni. Ka luhlulna avang khan ka tawng lo tep kha a ni a. Pathianin a sawi anga amah ring ngam lo ni ila kan tawng hauh lovang. Ka theihnghilh loh tur zirlai a ni.

”I sumin Lalpa chawimawi ṭhîn la, I neih pung hmasate nên chuan.“ ‭‭Thufingte ‭3‬:‭9

Ngaihtuah zui atan...

Thilpeka tiphurtu che kha eng thil nge ni. I theih nia i ngaih hmangin nge, nangmah kaltlanga Pathianin a theih hmangin i pek thin?

Pe tura a duh che Pathianin engtin nge a hrilh thin che?

I mamawh laia i pek lohna tura tizam thintu che engnge ni?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...