Rinna Huaisen
By Rick Warren
— April 25, 2024
“Chau hnenahte chuan thiltihtheihna a pe ṭhin a; chakna reng nei lote chu a tichak ṭhin.” [Isaia 40:29]
Isua chu i ring a nih chuan nitina i hman theih turin Pathian chakna chu i hman phakin a awm tihna a ni.
Hei hi thil ropui ni lo anga ngaih chang ka nei. Mahse ka hriat chhuah tak chu mi tam berte tan chuan harsatna lian ber chu thil lungkham emaw hlauhna emaw khakna emaw a ni lo. An buaina hmasa ber chu hahna a ni.
Mite chuan, “Ka chau em em reng mai a ni. A vai chuan ka thawk thei lo. Ka nuam lova ka dam lovin ka hah a ni” an ti fo ṭhin.
I chauh em em fo chhan chu thiltihtheihna [power] i tlakchham vang a ni. Thiltihtheihna i tlakchham chhan pawh chu Pathian thiltihtheihna i zawm loh vang chu a ni bawk. Nangma chakna chauh rinchhana nun i tum vang pawh a ni bawk ang.
Pathian nena inzawmna mumal nei lo chuan engti kawng mahin i nuna tih tur awm te chu i hlen chhuak thei ngai lo vang. Current-a invuah lo khawl [blender] chuan ṭangkaina engmah an nei lo. Vacuum cleaner [khawl hmanga hmun phiah faina] pawh electric tel lo chuan ṭangkaina a nei miah lo bawk.
Isaia 40: 29 chuan hetiang hian a sawi, “Chau hnenahte chuan thiltihtheihna a pe ṭhin a; chakna reng nei lote chu a tichak ṭhin,” tiin.
I ngaihtuah mai thiam dan aia nasa fe khan Pathian thiltihtheihna chu i mamawh a ni. Paula chuan hetiang hian a sawi, “Mi tichaktuah chuan engkim ka ti thei a ni.” Tiin. [Philipi 4: 13]
Chu chu rilru puthmang hrisel a ni lo. Chu chu mahni leh mahni inchinfelna a ni lo. Chu chu puanven sawichhinga din ngheh tihna lam a ni hek lo. Ni lo – chu chu thiltihtheihna ropui danglam bik a ni!
A “dinhmun” hrang hrangte chu eng nge ni? Pathian tanpuina chuan lunglenna hmunah lunglen dan i thiam ang. Rilru hahna i neih changin rilru hah dan i thiam ang. Mahni inthiamlohna leh hlauhna leh ninna leh khakna leh hnawl nihna chu. Sum chungchanga buaina hmachhawn dan. Hriselna avanga buaina hmachhawn theihna. Inlaichinna chin fel dan.
Chu thiltihtheihna chu khawi lam aṭanga lo kal nge? Nangmaha Pathian awm – Thlarau Thianghlim aṭanga lo kal a ni. Chu thiltihtheihna chu Isua Krista chu nangmah chhandam turin a lo kal a ni tih i rin hun chuan i chang ve ang. Eng ang dinhmunah pawh chu chu I tana hman mai theihin a awm reng bawk.
Ngaihtuah zui atan.
Pathian thiltihtheihna zawm tih chu engnge a awmzia? Engtin nge chakna a pek che a, a fuih phur che?
Pathian chuan engtin nge i hun chu hmang turin a duh che a, chau lova amah i zawm theih nan chuan engnge i tih tak ang? I ngaih pawimawh zawngte chu engtin nge thlak a nih dawn?
Vawiin hian i hmachhawp hlen chhuak turin engtiang takin nge Pathian thiltihtheihna chu i mamawh? Engnge ti hmasa tura a duh che chu?
Pathian thiltihtheihna chu engtin nge i nunah i neih?
A rahbi hmasa ber chu Isua Krista chhandamna Pathian thutiam lo rin chu a ni. Pathian hnena i nun hlan tura i inpeih tawh a nih chuan he ṭawngṭaina hmang hian i nun hlan ang che:
“Isu duhtak, I thutiamah chuan nangmah ka ring che a nih chuan ka thil lo tihsual tawh zawng zawngte chu ngaihdam a ni dawn a, engtik niah emaw chuan i chatuan inah chuan min lo la hmuak dawn tih ka hria.
“Ka sualte avangin thupha ka chawi a, ka nunah hian ka Lal leh Chhandamtu ni turin ka lo lawm a che. Chhandamna chu a thlawn a ni tih leh khawngaihna vang a ni tih leh ka thawh chhuah a ni lo tih i sawi kha ka ring e. Ka nun hi hi i kutah ka kawltirin a eng lai pawh mai hi I thuneihna hnuaiah ka rawn hlan e.
“Tiam chin awm lova min hmangaihna avangin lawmthu ka sawi a. Ka nun hmabak la awm zawng zawngte hi midang te rawngbawlna atan hman ka duh a. Ka nun hi I kutah ka hlan I chhungte zinga min telh ve tur chuan ka ngen a che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu*: Peka]
No comments:
Post a Comment