Pathian Nena Thawhdun
*THEIHNA HMAN LOH HMAN DAN*
By Rick Warren
— March 14, 2024
“An pu lo kal huna bawih chutianga ti a rawn hmuh chu a nihlawh e.” [Luka 12:43]
Mitinte hian theihna hman chhuah loh kan kawl vek awm e. Chutiang theihna hman chhuah loh chu thil ṭangkai leh Pathian ropuina tura hman dan kawng thum a ngaihtuah theih awm e.
1. *I theihna chhut rawh*
I nun kha chhut nawn fo ang che. I theihnate chu endik bawk rawh. Eng thilah nge i ṭhatna a awm? Ziak chhuak rawh. Thangtharte tana entawn tur eng emaw ka nunah a awm a nih chuan, chu ngei chu a ni e: I chakna lai hre rawh. I chak lohna hre bawk la. Pathianin theihna a pek che chu ngaihtuah nawn ang che.
Nu leh pate u, in fate chu an nihna Ruangam hre thiam turin pui rawh u – an thlarau thilpek dawn, an theihna, an mizia leh thil tawn te chu. In fate chuan in rin phak baka sang theihna an nei tih hria ang che.
2. *I theihna hlan rawh*
A duh dana a hman atan i theihna chu hlan ang che. Rom 12: 1 chuan hetiang hian a sawi, “Chuvângin, unaute u, Pathian khawngaihna avâng hian, inthawina nung leh thianghlim, Pathian lawm tlâk ni tûrin, in taksa chu a hnêna hlân tûrin ka ngên a che u, chutiang chu in rawngbâwl dân tûr tak a ni e” tiin.
3. *I theihna chher hnum rawh*
Chu chuan tihchhin, tihhmasawn, tihhriam leh tihchangtlunte a huam thei ang. Pathianin mihringa theihna a dah reng rengte chu hmana pung zel a ni. Bible chuan Thuhriltu 10: 10 ah hetiang hian a sawi, “Hriamhrei bil i tah loh chuan A hman a hahthlâk ang. Thil ngaihtuah lâwk hi a hlâwk a ni.”
Engtin nge thiamna chu i neih? Tihchhinin. Pathian chuan i hreipui chu tat hriam rawh a ti a. Hreipui bil chuan tha a heh bik. Fing zawka thawkin, hah zawka che turin min ti lo. I theihna chher hriam – i finna, i thiamna chher that chu thlarauva i mawhphurhna a ni.
Pathian chuan nangmahah theihna tam tak a dah. Pakhatna, a siam che. Pahnihna, thlarau thilpek leh mizia a pe che. Tichuan Isua chu i tana thi turin a rawn tir. Pathian chuan i nunah thil hlu tam tak a dah a ni! Engtik niah emaw chuan hetiang hian a la zawt ang che, “Thil pek i dawn chu engtiang takin nge i peipun? I thilpek dawn chu engtiang takin nge min chawimawi nan i hman a, engtiangin nge eizawn nan leh midang entawn turin i hman? Midangte ṭanpuina atan engtin nge i hman?
Luka 12: 43 ah chuan Isuan hetiangin a sawi, “An pu lo kal huna bawih chutianga ti a rawn hmuh chu a nihlawh e,” tiin. Chutiang vanneihna chu chang turin ka duhsak che. Pathianin theihna a pek che dik taka i hmang lai a rawn hmuh che chu ka duh e.
Ngaihtuah zui atan.
Hun rei lo te tal i theihna chhut nan han hmang teh. Eng nge i ṭhatna lai? Eng nge i chak lohna lai?
I theihna Pathian hnena i hlan loh eng nge awm? Chutiang theihnate chu Pathian hnena hlan tih chu eng nge a awmzia ni ang?
Thilṭha tinrengte chu Pathian hnen aṭanga a thlawna kan dawn a ni. Nangmaha theihna a dah avang khan lawmthu sawina hun rei lote tal han hmang teh. Hetiang deuh hian i tawngtai thei ang, “Lalpa, keimaha theihna awmte pawh hi ka lo hre mumal lo tlat a, mahse lawmthu ka hrilh a che. Hmu chhuak turin min pui rawh. Vawiin hian i tan ka lo hlan let e. I tana i hman atan i theihna min pêkte hi ka lo hlan let leh e. Ka theihna te hi tih hmasawn zel ka duh a. Ka thiltih lai mekah chuan hmasawn ka duh bawk e. Keimaha theihna sang ber sawr chhuaka i ropuina puan chhuah ka duh. Theihna keimaha i dahte hmang chuan chawimawi che a, mite rawngbawlsak a, intun-nunna atana hman a, mite kawhhmuhtu nih ka duh e. Keimaha theihna awmte hi pawisa thawh chhuahna atana hmang a, mi harsa leh chhumchhe zawkte tanpuina leh ka lawina kohhran than lenna leh rawngbawlna atana hman ka duh. Ti thei turin min tanpui rawh. Isua hmingin hengte hi ka dil e. Amen”
[Lettu: Peka]
No comments:
Post a Comment