Friday, March 1, 2024

INPEIH RAWH, NGHAK LAWK RAWH

Hmuh Theih Loh Indona

By Rick Warren
— March 1, 2024
 
“Lalpa chu amah nghâktute
tân a ṭha a, amah zawngtu tân chuan.
Lalpa chhandamna beiseia
nghah veng veng chu a ṭha a ni.” [Ṭah Hla 3:25-26]
 
I nun chu a keh darh mai anga a lan chang chuan i tana a hmachhawn dan “thlarau” ber leh ṭha ber tur chu mak i ti zawk mai thei: Pathian nen fianrial hun hmang la, nghak tlat rawh.
 
Bible chuan Ṭah Hla 3: 28-ah chuan hetiang hian a sawi, A bahtîr tawh avângin amahin ṭhu sela, ngawi reng rawh se.”
 
Mi tam berte chuan chu fianrial nun a luh dan chu kan hre lo a ni. Hlauhthawnnain kan khat fo. Pathian nghah chu kan thei lo, a chhan chu a hahthlak a ni. A thunei zawk nih kan duh tlat.
 
Pathian nghak tih chu engnge a awmzia ni ang? Thu la, I ka chip la, ngaithla tawp mai ang che. I Bible i chhiar thei bawk ang. Ṭawngṭai la. Chung zawng ai chuan Pathian hmaah chuan ngawi ang che.
 
Jeremia min chah anga “beiseina lo lang tur” nghah na chang kan hriat loh chang chuan lungkhamnain min tibuai ṭhin. Pathian chuan min biak a duh a. Beiseina kan mamawh tak chu min pek a duh a ni. Mahse kan buai lutuk a, kan hre thei lo fo.
 
Pathian aw kan ngaihthlak duh a, beiseina kan tana a dah chu chang turin amah nen chauha hun kan hman a ngai a ni. Chu fianrial nun chu hmangin a aw kan ngaihthlak a ngai a ni.
 
Isua chuan Matthaia 6: 6 ah hetiang hian a sawi, “Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che,” tiin.
 
Pathian lakah dik takin ti rawh, tichuan ngaihtuahna chu i harsatna nei mek – lian tak anga lang aṭang chuan Pathian khawngaihna chu i thlir thei ang.
 
Tah Hla 3: 25 chuan hetiangin a sawi, “Lalpa chu amah nghâktute tân a ṭha a, amah zawngtu tân chuan” tiin.
 
I buaina nangmah maia chinfel i tum hma chuan Pathian chuan ṭanpui hmasa che rawh se. Buaina eng ang pawh lo tawk mah la, a hun tiam chu i nghah phawt a ngai. I chet lehna tur chu ṭha takin a ruahman sak ang che.  
 
Ngawi la, ngaithla rawh. Tichuan, beiseina lo lan hun chu nghak ang che.
 
Ngaihtuah zui atan.
 
I hun kal tawhah i hmanhmawh lutuk avanga buaina i lo tawh tawhna chu i ngaihtuah thei em?
 
Hun harsa i paltlang lai chuan eng vangin nge Pathian nghah chu a harsat tlat?
 
Pathian hmaa i inlan theih nan leh amah chu fianrial hun hmanga i lo nghah theih nan i hun hman dan leh chet danah chuan engnge tihdanglam ngai?
 
Pathianah chuan chawlhna i neih theih nan i inpeih tawh em?
 
A rahbi hmasa ber chu Pathian nena inrem chunga Isua chu i Lal leh Chhandamtua pawm chu a ni. He ṭawngṭaina hmang hian bul i ṭan thei ang:
 
“Lalpa duhtak, ka sual avanga nangmah hlata awm chu ka duh tawh lo. I thutiamah chuan Isua ka ring a nih chuan, ka thil lo tihsual tawh zawng zawng min ngaidam dawn tih min hrilh a, ka dam chhan chu min hmuhtîr dawn tih min hrilh bawk, tichuan i chhungte zingah chuan min la lawmin eng tik niah emaw chuan chatuan nun nei turin vanramah min la hruai dawn tih ka hria.
 
Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian.
 
Ka nun hi min siam ang taka hman ka duh a. Min hruaiin i duhzawng tih min zirtir ang che. Isua hmingin ka dil a che. Amen.”
 
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
 
[*Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...