_Hmuh Theih Loh Indona_
Rick Warren
Feb 12, 2024
”Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e.“ Ephesi 6:12
I hre lo a ni maithei a, mahse indona mualah i awm mek a ni. Sipai thuam i inbel lo a ni thei a, silai mu i dawng lo pawh a ni thei e.
Mahse indona hmuna awm i ni - indona hmuh theih lohah. Chu chu thlarau indona tih a ni. I pian tirh ata i thih thlengin indona hmunah hian i awm dawn a ni.
Bible chuan i nun leh Pathianin i tana a duh tiderthawng thei hmelma pathum i nei tih a sawi:
Khawvel: kan chhehvel a thilawm te
Tisa: nangmaha mihring hlui awm kha
Setana: thil awm tak tak 'ru tur, ti hlum tur leh ti chhe tura' (John 10:10) che chhuak thin bakah a hnuaia tirhkah te.
Indona i awmna hmun ata chu silai mu emaw ral rel thiamna emaw hmanga hnehna chan chi a ni lova. Bible chuan, ”Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e" a ti a ni.
He indonaah hian, a pawimawh ber chu Isua a ni. I nunah chuan sipai General a nih a ngai a, indona hmuna thuneitu a nih a ngai a ni. Ringtu i ni thei a, mahse he indonaah chuan chu ngawt chu a la tawk lo. Isua chu i Lal a nih a ngai a ni.
Mi tam tak chuan Isua chu an ring a. Mahse khawvel, tisa leh setana laka hnehna chang tur chuan Isua chu mi tu emaw i rin ang mai piah lam a nih a ngai a ni.
Rom 7:24-25 ah chuan, ”Mi rethei ka va ni tehlul êm! He thihna taksa lakah hian tuin nge mi chhan chhuak ang? Isua Krista, kan Lalpa avângin Pathian hnênah lâwmthu ka sawi a ni" a ti.
Min tichau em em thin he indona atan hian mahni inpuih theihna tur seminar emaw, lehkhabu tha emaw, inkhawmpui emaw a ni lo. Isua a ni. I pu atan siam rawh. Paula, Rom lehkhathawn ziaktu khan amah ngawta hnehna a chan theih lohzia a sawi a. A beiseina awm chhun chu "Kan Lalpa Isua Krista" chauh kha a ni.
Chu chu i tan pawh a ni ve tho. Isua, Lalpa, nangmah tlantu chu.
Ngaihtuah zui atan...
I nunah thlarau indona i hmachhawn nasat zual lai nia i hriat a awm em?
Mite hian engvangin nge an harsatna sukiang tur hian thil hrang hrang an tih thin a, Isua lam pan an tum si loh?
Isua rinna mai leh nuna Lal nih tir chu engnge a danglamna?
(Lettu: Msa)
No comments:
Post a Comment