_Hmuh Theih Loh Indona_
By Rick Warren
— Feb 22, 2024
“He rilru, Krista Isua pawha awm bawk kha, nangmahniah awm rawh se.” [Philippi 2:5]
I nun thlak tur chuan ngaihtuahna thar neih a ngai. I nuna thil ṭha lo thlak tura indona i hmachhawn chu rilru indona aṭanga inṭan a ni fo – chu indona chu miin hnehna a channa hmun emaw a tlawmna hmun emaw a ni thei ve ve.
Ephesi 4: 23 chuan hetiang hian a sawi, “In rilru thlarauvah chuan a tharin lo awm ula” tiin.
I rilru leh ngaihtuahna chu thlak a nih hma chuan i danglam thei ngai lo vang. Hei vang tak hian nitina fianrial nun hi a pawimawh hle a ni. Tihtakzeta Pathian thu zirna leh ṭawngṭaina hmanga amah biakna chu i rilru thlarauva siamthar a nihna kawngah a pawimawh takzet a ni. Thlarau Thianghlim ṭanpuina nen pawh, inthlak danglam tak tak tur chuan thlarau nuna mahni inthunun theihna a pawimawh tel tlat. Pathianin nangmaha a phut che leh a duhzawngte chu hre chiang tur chuan Pathian chu i hriat tak tak a ngai a ni.
Theology zirna huangah chuan “rilru danglam” tih ṭawngkam thumal an hman ṭhin chu i lo hre ve tawh em? “Simna” tih a ni. Simna tih thu chu a ngialngan chuan rilru puthmang thlak tihna a ni.
“Sim” tih thumal chu a Greek ṭawngah chuan _metanoia_ tih a ni. _Metanoia_ tih chu rilru thlak a ni – thihna aṭanga nunna lam hawi, sualna aṭanga ngaihdamna, inthiam lohna aṭanga thlamuanna, hremhmun aṭanga vanram hawi zawnga nun a ni. “Keima kawng” tih aṭang chuan Pathian kawng i hawi tihna a ni bawk. I nuna thil inthlakthleng zinga ṭha ber chu sual kawng kalsan a ngaidamna leh thlamuanna chang tura i rilru i thlak ni chu a la ni ang.
I fel lohna lai chu rilru thar senga i ngaihtuah a ngai ang. Thil nihna fel lo eng emaw zatte hi chu chàkna hmansual emaw te a ni zawk hial thei. Chu chu ngaihtuahna thar a ngaihna hmun chu a ni thei. I lo ngaihtuah ngai vak mang lo thei, mahse chu chu simna chu a ni tlat! Chu chu rilru thlak danglamna chu a ni. I fel lohna lai anga lang chu Pathianin chakna a pek che i hman sualna lai chu a ni thei.
I chakna awmze nei taka i hman chhuah theih nan i thil ngaihtuah dan chu i thlak danglam a ngai a ni. Chutianga awm tur chuan, “He rilru, Krista Isua pawha awm bawk kha, nangmahniah awm rawh se” tiin a sawi. [Philippi 2:5]
Pathian chuan Isua anga thil thlir turin a duh che. Chu chu engtin nge i lo tih? A hma ang thovin, chu chu mimal duhthlanna a ni. “Lalpa, hei hi Isua chuan engtin nge a thlir ang” tia i ngaihtuahna i sen a ngai ang. Pathian thu ngeia i rilru i chhun khah zel chuan chu chu a awlsam deuh deuh thung ang.
Ngaihtuah zui atan.
I thinlunga i thil khawlkhawmte chuan i tlin lohna laiah a ṭanpui che nge a tibuai lehzual zawk che?
Vawiin hian i hun hman danah, mite nena inlaichinnaah, thil thlir danah chuan thlarauva siamtharna i chan theih nan engnge thil thlak danglam ngai?
A chang chuan Isua hian kan hun tawng eng emaw hi chu engtin nge a hmachhawn ve ang tih hi kan hre mai ṭhin lo a ni em?
[ *Lettu* : Peka]
No comments:
Post a Comment