_I Nun Dan Thlirlet La_
Rick Warren
Feb 5, 2024
”Khatia, nasa taka, tuar zawh rual lohva, nun rêng pawh beisei lo khawp hiala delh beha kan awm kha. A ni, thih mai chauh hmabâk tawhin kan inhria a, mahni inring lova, Pathian, mitthi kaithotu chu kan rin zâwk theihna tûr a lo ni. Chutianga thihna râpthlâk ata chu Pathianin min chhan chhuak tawh a, min la chhan chhuak leh ang; min la chhan chhuak leh zêl dâwn tih amahah chuan beiseina kan nghat a;“
2 Korinth 1:8-10
I chungah eng natna pawh thleng se, thlan tur pahnih i nei a: Pathian i pan thei a, emaw Pathian hnen atangin i tlan bo thei bawk.
Pathian hnen atanga i tlan bo chuan, khawi lam panin nge i tlan ang le? Pathian aia tanpui thei zawk che tunge awm chuang le?
Ka fapa Mathew-a thih kum atang khan, Pathian pan tur hian duh ka thlan fo a ngai a. A nihna takah chuan, ka hma lam hun zawng zawng belhkhawm aiin khang kumah te khan Pathian nen kan lengdun tam zawk a ni. Engvangin? Natna hian Pathian min hnaihtir dan kawng hi a nei ve a ni.
I nat laiin engtin nge Pathian i hnaih theih ang? I tih hmasak ber tur chu i tawrh dan chu a hnenah i thlen thei a. Eng emaw chhiatna i tawh reng reng, thlipui leh lirnghingah pawh "Aw Lalpa" kan ti fo thin a nih kha.
"Lalpa, hei hi ka duh lo. Ka thin a rim" pawh ti mahla chu chuan Pathian a hnaihtir tho tho che. Chu chu tuar lai tawngtaina/ tah hla an ti a ni.
I rumna kawng tinah Pathian chibai buk i zir a ngai. Kawng dang zawnga sawi chuan, i tawrhna inbunruahna atan tawngtaina i hmang a, i lungngaihna i bunruak a, i thinlungin i rum a. Kalna tur i hriat loh hian Pathian hnen i pan thin a ni. I nunah thatna chhuah turin i natna chu i thlen a. I thinlung pawh i thup lova. Pathian hnenah engkim thlenin amah i hnaih thin a ni.
Paulan 2 Korinth 1:8-10 a a sawi ang hian i ti ve ang: ”Unaute u, Asia rama kan chunga hrehawm thleng thu kha in hriat loh kan duh lo va, khatia, nasa taka, tuar zawh rual lohva, nun rêng pawh beisei lo khawp hiala delh beha kan awm kha. A ni, thih mai chauh hmabâk tawhin kan inhria a, mahni inring lova, Pathian, mitthi kaithotu chu kan rin zâwk theihna tûr a lo ni. Chutianga thihna râpthlâk ata chu Pathianin min chhan chhuak tawh a, min la chhan chhuak leh ang; min la chhan chhuak leh zêl dâwn tih amahah chuan beiseina kan nghat a".
Mi tam tak an nat laia Pathian chibai buk te, rin te leh Pathian hnaih an zir avanga an nun danglam ta hi tam tak ka hmu tawh a. An thinlung a kehchhiat lai aia hnaiin Pathian an tawng ngai lo tih an hria a ni.
I natna chu liamtir mai mai suh. Pathian lam hawitir che sela, amah leh a thu chhiarin pawl tam la, a thutiamte hre thar zel ang che.
Ngaihtuah zui atan...
Natna i tawhin khawi lam nge i pan thin?
Pathian thuin i nat laiin engtin nge a puih che?
I nunah Pathianin engtin nge i natna te thil tha zawkah a chantir theih dan le? I nunah chutianga thlentir chu i tawng tawh em?
(Lettu: Msa)
No comments:
Post a Comment