I Nundan Thlir Let La
- Rick Warren
- January 14, 2024
"Mi tûpawh mahni châkzâwng ti tûra hruai bo leh hîpa an awm hian thlêmna tâwk an lo ni zâwk ṭhîn." (Jakoba 1:4)
Ka pa tan chuan sangha man loh ni chu hun khawhralna ni mai a ni. Engpawh thleng se sangha man tur chuan minute sawmthum tal hun a insiam ngei ngei ṭhin. Ka pa sangha man chu ka thlir reng a (kei chuan engmah ka man lo), sanghate chuan nghakuai hlang, engmah chawchah awm lo chu an seh ngai miah lo tih ka hre thei.
Engmah dah lovin nghakuai ringawt chiahin sangha man i inbeisei ringawt tur a ni lo. A chah i khai tel tur a ni; tin, sangha mantu ṭha chuan sangha hrang hrangin an duhzawng a hre hrang ṭhin.
Sangha mantuten sangha hrang hrangte duh an hre hrang ang chiah hian Setana hian min chah dan a hre em em a. I thil duhzawng leh i rilru lakpen dan a hre em em a ni. I chak lohna lai a hre hle- i thinlung chakzawng i hmuh mai si loh te, i rilru ruak tlat leh, i chakzawng takte kha.
Chuvang chuan, i ngaihtuah turte i ngaihtuah a ngai a ni. A nghakuai chu sual a ni a, a chah chu dawt engpawh Setanan awih tura a duh che kha a ni. I sahuat lai a hre hle a: hetiang i tih chuan i hahdam ṭhin. Hetiang i tih chuan a hlawk ṭhin. Hetiang i tih chuan engkim a ṭha vek ang.
A chah phenah khan nghakuai a awm tih hre mah la, i la hap tho mai thei. A chhan chu, Setanan dawt a hrilh apiang che kha i lo awih duak duak ṭhin. Mahse, a nghakuai paltlanga a chah chauh ei thei a i inngaih chuan i inti â mai mai a ni. Na lo tura i inngaihna kha Setana bumna tho a ni.
Dawt tlanglawn ber pakhat chu hei hi a ni: thlem i nih apiangin pawnlam aṭanga thlemnaah i ngai zel hi.
Mahse, thudik chu hei hi a ni: Harsatna tak tak chu pawnlam a mi a ni lo.
Jakoba 1:14-ah chuan heti hian a ti, "Mi tûpawh mahni châkzâwng ti tûra hruai bo leh hîpa an awm hian thlêmna tâwk an lo ni zâwk ṭhîn."
Thlemna chu kan chhungril duhna aṭangin a inṭan ṭhin. I chaklohna lai kha Setana chuan a hmang ṭhin. Khang duhnate khan sualah a hruai lut che a, chung sualnate chuan thihnaah a hruai lut che a ni. I ngaihtuahte khan i awmdan a hril a, i awmdan khan i thiltih a hril bawk a ni.
I hun tawnte mawhpuh suh. Thlem i nih chuan, engmah ti thei lo angah i inngai a. I ti thei a ni! I ngaihtuahnate thlak danglam phawt a ngai a ni.
Thlem i nih chuan he zawhna hi zawt ṭhin ang che , "Eng dawt nge ka rin tak?"
Tichuan, Pathian thudikin thlak rawh. Nunnaah a hruai ang che.
Ngaihtuah zui atan.
Eng dawt thuah nge Setanan i sihhnipzia a hriat?
Thlemna hotê anga langa tlukin engtik khan nge mahni inthunun thei ni a i inhriat? Engnge a rah chhuak?
Thlem a i awm laiin engtinnge Pathian thutak i inhrilh nawn theih ang?
*Engpawh lo ti tawh mahla Pathianin a hmangaih che.*
Mihring kan nih avangin vawi tam tak Setana thangah awkin kan lo tang tawh ṭhin. Mahse engpawh tiin khawiah pawh kal tawh mahla Pathian chatuan chhungkuaah i tan hmun a la awm reng a, an la nghak reng che a ni. Sawmna zau taka hawn a ni. Ring la dawng mai rawh.
I inpeih em? He ṭawngṭaina hmang hian bul han ṭan teh le: "Lalpa, ka thih hunah i hmaah ka chanchin ka sawi dawn tih ka hria e. Ka phatsan ṭhin che tih ka hria a. I chungah thil ka tisual tih ka hria a, i duhdan ni lovin ka duhdanin ka nung tih ka hria e. Chu chu vawiin hian thlak ka duh a ni. Sual kawng zawh tawh lova i hnung zui ka duh e.
"Ka tan thi tura Isua i lo tirh avang leh chumi zara chatuan nunna ka neih theih avangin ka lawm e. Min ngaihdam ka phu lo tih chu mahila, i khawngaihna chauhin min chhandam thei tih ka hria e.
"Isu, min hmangaih nasat em avanga ka sual zawng zawng i phurh avangin ka lawm e. Vanram hmu tlakah min siam a, min chhandam turin ka ngen a che. Tuna ka nun chawk buai mektu ka sualna leh chin ṭhan ṭha lo lak ata min chhanchhuak turin ka ngen a che. Isu, ka ra ring che a. Tunah ngei hian, chiang takin, ka pumin chatuan atan vanrama min hruai turin i thutiam i hlen ang tih ka ring. Isua hmingin, Amen.
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]
No comments:
Post a Comment