LI THUK LAM PANIN
Luka 5:4-7
Thuhmahruai: Kumthar lawmawm takah hian Isuan Petera a kohna thu mawlte hmang hian thu i zirho teh ang. Petera lawng chu Isuan thusawi nan hmangin, chuta tang chuan mipui a zirtir hlawm a ni. Mihringte beidawn hnuah Pathian a che thin a. Keimahni duhzawnga kan kal hian kan hlawhtling thei thin lo va, Isua duhzawnga kan kal chiah hian hlawhtlinna kan chang thin a lo ni zawk.
Petera hlawhchhamna kha: Petera beidawnna kha a eizawnna hmun a ni. Kan eizawnna hmun leh kan rawngbawlna hmun ah ngei hian kan hlawhchham ve fo thin. Kan rawngbawlnaah ngei pawh hian hmasawn theih lohna lai kan neiin alang tlat a ni.Sangha mantu tawnhriat ngah tak ni mahse Petera chuan thingrem siamtu thurawn chu a pawm a, “Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e” a tih avangin a lente chu a lo khat ta a. Isuan Petera chu sangha tam tak awmna a hrilh a - Petera leh mi dangten zankhuaa rim taka thawk chunga an hlawhchham tawh hnuah. Lalpa engkim hria chuan sanghate kalna lam chu a hria a ni. Keimahni finna leh chaknaa rawngbawlna kan kalpui hi a thlawn mai a ni.
Mihring thiltihtheihna engmah anih loh zia kawhhmuhna a ni: Mihring duhdana kal ringawt hian awmzia a neilo thin a. Kan experience te hi chhuan chi a ni lo. Petera khan zankhuain len a denga, a chau tawh hle. Thingremsiamtu ai chuan sangha man dan chu a hrezawk. Sangha man hun tha ber chu chhun ni loin, zan hun hi a ni tih pawh a hre zawk. Anihna takah chuan mipui tam tak dilkama pungkhawm leh Isuan lawng atanga azirtirna ring tak chuan sangha a hnawt bo vek a, bakah an lente kha an su fai tawh a ni. Isuan sakhuana chu ahria ani maithei mahse sangha man chungchang kher chua a hriat an ring lo a ni.
Mihring beidawn tawhnaah pawh Isuan ropuina a chang thei: Sangha pawh man theilo kha Mihring mantua siam Isuan a tum a. Tlinglo inti tam tak kan awm mai thei e. Hei hian Isua rinchhana kal a tulzia a ti lang a ni. Tlinglo chung pawha “Li thuk lam panin len te deng rawh” min ti tu chuan, min ti thlawn dawn lo a ni.
Lithuk lam pan tur chuan: Thuawihna a pawimawh a, Isua thuawihin Peteran Sangha tam tak a man a ni. “… i thuin lente ka deng leh ang e” tih hian- tlawmna hlutna, zirtir theih nihna, thuawih pumhlumna a entir a ni. Petera ang hian Isua duhdana rawngbawl a hun tawh a ni. Petera hlawhtlinna chhan chu Isua thu a awih vang a ni. Peteran zirtirtu a tih hi epistata (Greek) a ni a, chumi chu master, leader, boss leh commander tihna pawh a ni a, epistata ina a entir chu Peteran Isua thupek zawm turin a inpeih tih entirna a ni.
Li thukah chuan eng nge awm?: Li thukah chuan lente chu chat khawpa tihkhah an ni a. Chuvangin vaukam lam thlahin tuifawn lamah kan inpumpek tur a ni. An lente chu a chat tan ta a, an lawnte chu a pil tana. Krista kaihhruaina chuan harsatna a thlen a. Nimahsela harsatna hlimawm tak an ni. Chungte chu sangha mantu dik tak thinlung tilawmtu harsatnate an ni. Rinna chuan li thuk a nei a, tuarna, lungngaihna leh channa te pawh. Chu chu a ni, lente rahchhuah hmanga tikhattu chu.
Tlangkawmna: Petera chu a hna tlawm tak a thawh laiin a ni Krista chuan mihring mantu ni tura a koh ni. Puihna i nghah laiin tih tur i hmuh apiang chu ti mai rawh. I theihna zawng zawngin ti rawh. Lalpa tan i thinlung takin ti rawh. Lawng khalh kawina chuan lawng a chet chauhin hna a thawk a, chutiang bawkin Pathianin mihringte an chet venaah a tanpui thin. Vawi tam mahni duhdanin kan lo kal tawh thin a, kumtharah chuan Lal Isua duhdanin ke kan pen a ngai a ni. Li thuk lam kan pan chuan kan hlawhchhamna hmun ngeiah Pathian hnawthawh lo langin - kan hlawhtlinna hmunah a chang dawn a ni.
Vanlalthansanga

No comments:
Post a Comment