_Pathian Thutiam Mak_
- Rick Warren
Jan 1, 2024
”In rilru thlarauvah chuan a tharin lo awm ula," Ephesi 4:23
Tha taka inthlak danglam tur chuan ngaihtuahna sen hmasak a ngai . I rilrua hlawhtlin leh hlawhchham inkarah he danglamna hi a innghat a. Ephesi 4:23-ah chuan, "In rilru thlarauvah chuan a tharin lo awm ula," a ti. Thlarauva tuh tharna chu i ngaihtuahna leh rilru puthmangah a innghat a, kawng danga sawi chuan, i ngaihtuahnaah a ni.
A awmzia chu hei hi a ni: I chhungril atanga thil i hriat thinte (feelings) hi an mahni a awm an ni mai lova. I ngaihtuahna vanga lo awm a ni. I ngaihtuahna kha a ni i thinlung thunun fotu chu. I thinlunga i hriat chuan i chet chhuah dan a hril leh a ni.
I thiltih dan thlakthlenga mahni inti chhe zawnga ze tha lo i neih thlak i tum chuan, chhungril atanga thil i hriat dan i thlak a ngai hmasa a. Chhungrila thil i hriat dan chu thlakin, "Heti zawng hian ka chhungrilah ka hre tawh lovang" i ti ngawt thei lo. Chutiangin awmzia a nei lo. I chhungril atanga i hriatna thlak thei tur chuan, i ngaihtuah dan i thlak phawt a ngai a ni.
Kawng danga sawi chuan, i thiltih dan i tih danglam duh chuan i chhungrila i hriat dan kha i thlak a ngai a. Chumi thlak tur chuan i ngaihtuahna i thlak a ngai a ni.
Hemi atan hian Bible chuan thumal a nei a: Simna tih hi a ni. Simna tih hi Greek tawng a _metanoia_ tih atanga lak a ni a. Meta awmzia chu "thlakthleng" a ni a, noia awmzia chu "rilru" tihna a ni. Simna awmzia chu rilru thlakthleng tihna mai a ni. Chu zawng chu a ni mai!!
Pathian hnenah kawng dang zawh i duh thu i sawina a ni a, thil dik leh tha i thlan theihna turin a tanpuina i dilna a ni. I thil ngaihtuah dan i thlak chuan, i chhungril atanga i thil hriat dan a danglam anga, chumi a danglam chuan i chetphung pawh a danglam dawn a ni. I rilru put hmang i thlak dawrh dawn tihna a ni.
Bible chuan Philippi 2:5-ah chuan, ”He rilru, Krista Isua pawha awm bawk kha, nangmahniah awm rawh se" a ti.
I ngaihtuahna kha i duhthlanna a ni a. Duhthlan hi danglamna bultanna a ni. Krista rilru i put a, a hmangaihte lamah i rilru i sen chuan, a engah i fel lohna i hmu telh telh ang.
Pathianin a hmuh anga amah, mi dang leh nangmah ngei i inhmuhfiah theihna turin dil la. I nuna danglamna thlen a duh chu i hrethiam thei ang.
Ngaihtuah zui atan...
Phurna nasa tak mai i neih lai ngaihtuah let la. I ngaihtuahnain engtin nge a thunun le?
Vawiinah hian i nunah sim i mamawh, i ngaihtuahna thlak danglam tura i tih tul engnge le?
Pathianin thil dik leh tha ngaihtuah tura a duh che engtin nge i hriat theih ang?
(Lettu :Msa)
No comments:
Post a Comment