Pathian Thutiam Mak
By Rick Warren
— January 04, 2024
“I sumin Lalpa chawimawi la, I thil lo pung hmasa ber zawng zawngte nên; Tichuan, i buh in chu a lo khat liam ang a, I sâwrkhur chu uain tharin a luang liam ang.” [Thufingte 3:9-10]
Pathian thutiam chu an va ṭha em!
Malsawmna tam tak nena vur che chu a intiam a ni satliah mai lo va, i hna leh sumdawnna thleng chuan malsawm che a intiam a ni.
Thufingte 3: 9-10 chuan, “I sumin Lalpa chawimawi la, I thil lo pung hmasa ber zawng zawngte nên; Tichuan, i buh in chu a lo khat liam ang a, I sâwrkhur chu uain tharin a luang liam ang,” tiin a sawi. Chang hmasa lam kha a finfiahna a ni: I sawma pakhat chu pe la. A hnuhnung lam chu Pathian thutiam a ni thung: Sawma pakhat i pek chuan Pathian chuan i ran in chu nasa takin mal a sawm ang che.
Tunlai hunah chuan mi tam berte chuan ran in pawh an nei mumal ta mang lova, wine dahna pawh an nei tawh awm lo ve.
Bible hun lai chuan, mi tin deuh thaw chu lo neitu an ni. An ran in neih chu an hnathawh tarlangtu niin an hmakhua leh an dinhmun pawh a lantir bawk. An ran in chu a khat ṭha a nih chuan, hlawhtlinna ropui tak leh malsawmna a ni.
Pathian chuan i thilphal a nih chuan, i hnathawh leh sumdawnna te chu mal a sawm ang tiin a sawi. I hmakhua leh hmabakte chu a eng zel ang. Nimin lama ka sawi tawh ang khan, a chang chuan chung malsawmna te chu tisa malsawmna a ni ang a. Mahse thlarau malsawmna thinlung thilphal tak aṭang chuan tam tak i dawng bawk ang. Bible chuan Thufingte 11: 25 ah chuan hetiang hian a sawi, “Mi thilphal nunna chu
tihthauvin a awm a, Tui leih ṭhîntu chuan mahni pawh a inleih a ni,” tiin.
Sumdawnna [business] neitu i nih chuan, hlawkna tam zawk leh hlawhtlinna chan i duh em? Thil siamtu emaw sumdawng [entrepreneur] i nih chuan i hmalaknaah chuan Pathian malsawmna chan i duh em? Pathian ṭanpuina i duh chuan, i chhungkaw nunah ni mai lovin i eizawnnaah pawh, a thutiamin a beiseina che chu i hlan hmasak ve a ngai ang. I thilneihte chu ui lova i hman ve fo a ngai ang.
“Ui rilru chungin pe suh u, phal takin pe ula; chutianga in tih chuan Lalpa in Pathian chuan in kutkawih mal a sâwm ang a, in tih apiangah in hmuingîl ang.” [Deuteronomy 15: 10]
Thilphalna chuan Pathian malsawmna chu a dawntir ang che.
Ngaihtuah zui atan.
I eizawnnaah emaw Pathianin hna a pek che emaw-ah chuan engtin nge i lo thilphal ang?
Pathian chuan eng vangin nge kan sumdawnna leh hnaah chuan thilphal turin min phut?
Thilphalna chungchangah chuan engtin nge i hna leh mimal nun chu i ṭhenhran ṭhin le? Engtiangin nge an inlaichin?
[ *Lettu* : Peka]
No comments:
Post a Comment