Friday, December 1, 2023

INTHLAK DANGLAM I TAN A ṬHA

Hun Khirh Tak Kara Ke Pen Dan

By Rick Warren
— December 1, 2023
 
“Lei hi a awm chhûng chu buh tuh hun te, a seng hun te, khaw vâwt leh khaw lum te, nipui leh thlasik te, chhûn leh zân te a tâwp lo vang.” [Genesis 8:22]
 
Thil inthlakthleng hi pumpelh theih a ni lo. Kan hre vek ang – mahse thil eng emaw a inthlak danglam chang chuan mak kan tih chang a awm leh tlat fo.
 
Thil a danglam chang chuan kan phun a, kan lungawi lova, midang kan dem tlat ṭhin. Thil inthlak danglam pumpelh theih chuang loh chu lo dan kan tum fo, kan thunun thei emaw tiin. Mahse vanhnuaia thil eng pawh mai hi an awm ngaiin an awm reng lo. Kan hun tawng apiangah hian inthlak danglam a awm, a ṭha zawngin emaw a chhe zawngin emaw.
 
Pathianin khawvel a siam lai bawr khan a thilsawi hmasak ber chu, “Lei hi a awm chhûng chu buh tuh hun te, a seng hun te, khaw vâwt leh khaw lum te, nipui leh thlasik te, chhûn leh zân te a tâwp lo vang,” tih a ni. [Genesis 8:22] A ruahmanna famkimah chuan Pathian chuan he khawvel engkim mai hi hunbi a ruatsak chu a ni. Thil engkim hi an inthlak ve reng a, kan hmu vek thei lova kan hre vek thei hek lo. I chhungte pawh an awm ngaiin an awm reng lo. I hna pawh a ngai rengin a awm lem lo. Nangmah pawh i awm ngaiin i awm lo.
 
Mahse a duangtu chu Pathian niin tha a tih thuin a nemnghet thung, thil inthlak danglam chu kan ṭhatna tur a ni tih kan hria. Thil inthlak reng chuan inthlahdah thei lovin min nawr a, kan thil hriatfiah lohah pawh Pathian ring turin min pui. Thil inthlakin min tihnat chang chuan amaha innghah dan min zirtir. Thil inthlak chuan kan thlarau, taksa leh rilru ṭhang turin a hrual a ni. Isua nena in len dunna kawngah a ṭha zawnga thil inthlak danglam a awm a nih chuan amah i ang deuh deuh tihna a ni ang.  
 
Thil inthlak tel lo chuan mi a ṭhang thei lo. Channa tel lo chuan engmah a danglam thei lo. Channa tel lo chuan lungngaihna a awm ngai lo. Natna tel lo chuan a lungngaih theih hek lo. Mi tu emaw thang duh a, hmasawn duh si tuarna tel lova kal duh si chu, “Naute neih ka duh a, mahse nau ka hring peih lo” ti ang vel a ni. A theih miah loh! He khawvela nunna thar piang tur chuan natna a awm a ngai. Thil duhawm ber ber dawng tur chuan thil inthlak danglam kan dawn ve a ngai tho, chu miin natna a zakzeh nen chuan.  
 
Thil hi a inthlak a, mahse hei hi hria ang che: Inthlak danglam chu a awlsam ngai lo, i hre thiam vek kher lo vang. Mahse Pathianin thil inthlak nangmaha a thlentir chu i tan a ṭha a ni tih chiang takin i ring thei ang.
 
Ngaihtuah zui atan.
 
Eng tiangin nge a ṭha zawngin nangmah kha i inthlak danglam?
 
Nangmah a thlak danglam che avang chuan eng vangin nge Pathian hnenah chuan lawmthu i lo sawi lawk ang, i la hre fiah lo chung pawh chuan?
 
I nunah emaw mi tu emaw i hmangaih nunah emaw chuan eng ang thil danglam nge Pathian chu thawk turin i duh?
 
[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...