Thursday, November 30, 2023

PATHIAN I LAMAH A TANG TIH HRETHIAM RAWH

Hun Khirh Tak Kara Ke Pen Dan
By Rick Warren
— Nov 30, 2023

“Ama duhzâwng tih tum tûr leh ti thei tûra nangmahnia thawktu chu Pathian a ni si a.” [Philippi 2:13]

Kar lo awm tur, thla thar emaw, kum thar emawah chuan i chungah eng pawh lo thleng se, nangmah mai chuan i hmachhawn dawn lo. Pathian chu i kiangah a awm a, nangmahah khan a awm a, i tan chuan a awm tlat a ni. 

Philipi 2: 13 ah hetiang hian kan hmu, “Ama duhzâwng tih tum tûr leh ti thei tûra nangmahnia thawktu chu Pathian a ni si a,” tiin. 

“Nangmahah Pathianin hna a thawk.” “Thawk” tih thumal Greek tawnga kan hmuh chu energos tih atanga lo kal niin “energy” [chakna/thahrui] tihna nen a inzawm. Pathian chu i chakna thahrui chu a ni. Nangma tumruhna ngawr ngawr chu a tawk zo lo. I theihna ngawr ngawr rinchhan chuan i kal thei mai lo vang. Pathian chuan chakna i mamawh tak chu a pe che, eng ang thil pawh lo hmachhawn mah la, a tanpui che.  

Nangmahah a awm a ni mai lova, i kiangah a awm. Bible chuan hetiang hian a sawi, “Fahrahin ka kalsan lo vang che u, in hnênah ka lo kal leh ang,” “Chutih hunah chuan kei Paa ka awm te, nangni keimaha in awm te, kei nangmahnia ka awm te in la hria ang,” tiin [Johana 18: 18, 20]. Chu chu thutiam ropui tak a ni! Bible chuan Krista chu nangmahah a awm tiin a sawi a; Bible tho chuan Pathianah chuan Krista nen thuhruk in nih thu a sawi, Bible chuan Thlarau Thianghlim hmanga chhinchhiah kan nih thu a sawi bawk. Chumi awmzia chu Setana chu i kiang rawn thleng tur chuan Pathiana Minung Pathum a hmachhawn hmasak a ngai ta a ni! Chu chu venhimna ropui tak a ni. Hlauhna tihrehna ropui tak a ni.  

Pathian chu nangmahah emaw i kiangah emaw a awm a ni mai lo, i tan a awm bawk a ni. Rom 8: 31 chuan hetiangin a sawi, Chûng thu-ah chuan eng nge kan sawi tâk ang? Pathian kan lama a ṭan chuan tuin nge min do thei ang?

Berampuin beramte hma a hruai chang chuan an hnung lamah beram vengthiam uipa a hnung lamah a awm chawk, chu chuan beramte chu a nawr zeuh zeuh a, kawng dik lamah a nawr thin a ni. 

Bible chuan i nuna berampu ui chu thatna leh nghilneihna a ni tiin a sawi. Pathian chuan i phu bak malsawmna a vur che – chu a thatzia finfiahtu a ni. I thil tih angin a thungrul mai ngai lo che, chu zahngaihna chu a ni. 

I nunah khan Pathian hlim hmel i lo hmu ve tawh em? A nih loh chuan Pathian chu i hrefiah tak tak lo thei a ni. Thenkhat chu Pathian chu mihring tute emaw an fate chunga thinrim ang chuan an ngai fo. 

Hlim taka khawsak I duh chuan zingah I thawh hlimin hetiang hian sawi ang che, “Lalpa, vawiinah min awmpui dawn avangin, keimaha I awm avang leh ka tana I awm remchan avangin lawmthu kan hrilh a che,” ti ang che. 

Ngaihtuah zui atan. 

Pathian chuan a thiltihtheihna i tana remchanga awm chu engtianga hmang turin nge a duh che? 

Engtik laiin nge Pathian awmpuina chu i rinhlelh nasat ber? I nuna Pathiann hnathawh hmufiah turin Pathian hnenah rinna dil ang che. 

Pathian I lama tang tih hriatna chuan hun harsa i hmuh dan chu engtin nge thlak danglam? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...