Pathianin Bahlahnate Dinchhuahlehnaa Chantir Dan
By Rick Warren
— Nov 23, 2023
“Tichuan, Pentikos kût chu hmang ang che u. Lalpa in Pathianin malsâwmna tam tak a vûr che u aṭangin amah chawimawi nân in thilthlâwn pêkte chu hlân rawh u.” [Deuteronomy 16:10]
American hoten Lawmthu-sawina-Kut [Thanksgiving] an hman ṭhin hi kum 400 vel liam taa an ṭan kha a ni.
Chumi hma kum 3000 ah khan Pathian chuan Israel Hnamte chu lawmthu sawina kut Lawmna Kut chu a buatsaih tawh a. Chu hun chu Pathian ṭhatna lawm leh lawmthu sawina atana hun hmangin kum tina an tih ṭhin angin Lawmthu sawina thil hlan an hlan ṭhin a ni.
Deuteronomy 16:10-11 chuan hetiang hian a sawi, “Tichuan, Pentikos kût chu hmang ang che u. Lalpa in Pathianin malsâwmna tam tak a vûr che u aṭangin amah chawimawi nân in thilthlâwn pêkte chu hlân rawh u. Lalpa hmaah chuan in fa te, in chhiahhlawh te, a hmei a pain in khuaa Levia chi te, hnam dang te, fahrah te leh hmeithai te in zînga awm ve te nên chuan hlim takin Lalpa in Pathianin a hming awmna tûra a thlanah chuan ruai ṭheh rawh u,” tiin.
Chu lawmthu sawina niah chuan Israel fate chuan lawmthu sawina thilpek, thilpek hlanna hmunah chuan an dah ṭhin ang – Pathian chibai bukna temple-ah chuan. Chu lawmthu sawina thilhlan chu Pathian mite chuan kum sang chuang fe an lo kalpui tawh ṭhin a ni tih Pathian thuah kan hmu.
Sam 50: 23 ah Pathian chuan, Lâwmthu sawi inthawina hlântu chuan min chawimawi a ni. A awm dân vawng diktu chu, Pathian chhandamna chu ka hmuhtîr ang,” tiin a sawi.
Bible chuan vawi eng emaw zat eng ang thilpek nge kan hlan ang tih min hrilh: Pathian hnenah chuan kan thil thar sawma pakhat kan pe ang – a chuang bang ni lovin. Kan sum thuah Pathian kan dah hmasa ber ang.
Pathian hnena thilpek i hlan chang chuan lawmna chi thum a awm thei ang: Thil kal tawh, tun hun leh hmalam hun. I thilpek chuan tun huna Pathian malsawmna avanga lawmthu sawina leh vawiina i malsawmna dawn leh hun lo la kal tura Pathian malsawm beiseina a keng tel a ni. Pathian chuan i rinna chu a malsawmna hmang chuan a chawimawi ṭhin che.
Bible-ah hian rinawm taka petute leh mi thil phalte tana thutiam tlukna tam thudang a awm lo. Eng vangin? A chhan chu Pathian chuan a fate chu amah anga awm turin a duh a. Amah chu mi thilphal tak a ni!
Isua chuan Luka 6: 38-ah chuan, “Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” tiin a sawi.
Isua chu i sual ngaidam tur leh i thlarau chhandam tura i ring a nih chuan Pathian chu a thutiam umzui tur chuan amahah rinna i nghat thei ang. A hnena lawmthu sawina thilpek i pek chuan amah chu i ring a, i nuna engkim rel fel turin i ring tih a entir a ni.
Ngaihtuah zui atan.
I sum thuah khan Pathian i dah hma dawn a nih chuan engtin nge thil i pek dan, i khawl dan leh hman dan chu i thlak danglam ang?
Pathian chu i sual ngaidam tura i ring tawh a nih chuan thil dang zawng zawng thua amaha rinna nghah chu engtianga awlsam nge a nih?
He Thanksgiving hunah chuan Pathian hnenah thilpek hmangin engtin nge lawmthu i sawi ang?
[Lettu: Peka]
No comments:
Post a Comment