Thursday, November 9, 2023

HMANGAIHNA TEL LO CHUAN I HUN I KHAWHRAL MAI A NI

 _Pathianin Bahlahnate Dinchhuahlehnaa Chantir Dan_ 

By Rick Warren

November 9, 2023


“Mihring ṭawngte leh vântirhkoh ṭawngtein thu sawi thei mah ila, hmangaihna ka neih si loh chuan, dâr ri ang emaw, dârbenthek ri ang emaw chauh ka ni ang.” [I Korinth 13: 1] 

He khawvelah hian Pathian leh midangte hmangaih dan zir tura dah kan ni. Hmangaihna hi kan nuna thil zir tur lian ber a ni hial awm e. 

I Korinth 12 chang hma lamah khan Bible chuan hmangaihna chu eng vangin nge thil hlu ber a nihzia a sawi a: 

 *Hmangaihna tel lo chuan i thil sawi zawng zawngte kha awmze nei lo an ni.* 

“Mihring ṭawngte leh vântirhkoh ṭawngtein thu sawi thei mah ila, hmangaihna ka neih si loh chuan, dâr ri ang emaw, dârbenthek ri ang emaw chauh ka ni ang.” [I Korinth 13: 1] Hmangaihna tel lo thu chu bengchheng mai an ni. Mite chuan hmangaihna tel lo thu chu an thinrimpuiin an hnar mai zel a. Mahse thu hmangaihnaa sawi erawh chu ngunthluk takin an ngaithla ṭhin.

 *Hmangaihna tel lo chuan i thil hriatte kha an tluantling lo.* 

“Thu hril theihna neiin, thu ril zawng zawng leh hriat tûr zawng zawng hre vek mah ila, … hmangaihna ka neih si loh chuan eng mah ka ni lo vang” [I Korinth 13: 2] Khawvel hi hriatna leh thiamna hmangain a puak phawng phawng a ni ber a, chuti chung chuan kan harsatna holam te anga langte pawh chinfel a ni hauh si lo. Chumi awmzia chu khawvel hian hriatna tam zawk a zawng a ni lo, khawvel hian hmangaihna a zawng a ni. 

 *Hmangaihna tel lo chuan i thil rin zawng zawngte kha an tawk lo.* 

“Tlâng sawn theihna khawpa rinna nasa nei mah ila, hmangaihna ka neih si loh chuan eng mah ka ni lo vang.” [I Korinth 13:2] Ringtu tam takte chuan rinna awmzia chu thutak emaw doctrine emaw rin mai chu nia ngaiin an hre sual duai fo. Mahse Isua i hmangaih em? Kristianna awmzia ber chu Isua hmangaihna hriatfiah leh amahin min hmangaih anga amah hmangaih let ve chu a ni. 

 *Hmangaihna tel lo chuan i thilpek zozaite kha an tawk zo lovang.* 

“Ka neih zawng zawng mi retheite tân pe vek mah ila, hâl tûrin ka taksa pawh inpe mah ila, hmangaihna ka neih si loh chuan ka tân eng mah a ni lo vang.” [I Korinth 13: 3] Thilpek miin a pek chhan hrang hrang a awm thei ang, pek loh theih loha ngaih vang emaw, hamṭhatna duh vang emaw mahni inthiam lohna pumpelh nan emaw a ni thei. Thil eng emaw i tih ngawt avang chuan hmangaihnain i ti tihna a ni chuang lo. Hmangaihna tel lovin i pe thei a, mahse thilpek pe lo chuan i hmangaih thei lo vang. 

 *Hmangaihna tel lo chuan i hlawhtlinna chan zawng zawngte kha an tawk zo lovang.*  

“Hâl tûrin ka taksa pawh inpe mah ila, hmangaihna ka neih si loh chuan ka tân eng mah a ni lo vang.” [I Korinth 13: 3] Hlawhtlinna zawng zawng changtu i ni thei e. Khawvela chhan ropui ber awm thei avangin i nun pawh i hlan a ni thei e – Pathian ram tan chuan – mahse hmangaihna tel lo chuan, thiltih hlawkna nei lo mai a ni ang. 

Tawng hmang thiam bik i ni thei a, mifing finna pawh neiin, thilmak tihna nei pawh i nei mai thei, mi thilphal niin midang tan i luangchhuak thei a, martar rilru pu pawh i ni thei bawk. Hmangaihna i neih loh chuan awmzia a awm lo.  

Mahse thu lawmawm chu hei hi a ni, midang i hmangaih theih chhan chu Pathianin a hmangaih hmasak vang che chu a ni e. A hmangaihnaa i nun i hman mek lai chuan Isua chuan midang hmangaih thei turin a pui ang che tiin a sawi. Amah i hnaih ang zel chuan midang i hmangaih theihna chu a lo pung ve zel ang a, midang hmangaih tura kohna chu tihlawhtling zel turin a pui bawk ang che.

Ngaihtuah zui atan. 

Mite chu zaidam, thuhnuairawlh leh hmangaihnaa anmahni kan biak chuan engvangin nge min dawngsawng ṭha zawka kan hriat? Sawma-pakhat pek chungchanga nangmah fuihtu ber che chu eng nge ni?  

Hlawkna um lo pawl eng emawa thilpek i pek chhan lian ber chu eng nge ni? 

Mi hlawhtlingte zingah an hlawhtlinna hmangaihnaa thuam leh hmangaihnaa thuam ni lo danglamna chu eng nge ni?

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...