_Pathianin Bahlahnate Dinchhuahlehnaa Chantir Dan_
By Rick Warren
- November 10, 2023
Pathianin a thiltihsak che chu midang tan pawh tih ve a duh.
Pathian chuan chintawk awm lovin a hmangaih tlat che. Mahse chuvang chuan i thil tih apiang a pawmpui che tihna erawh a ni lo, mahse, eng ang thil pawh lo ti tawh la, a pawm che. Tichuan Pathian chuan midang bulah pawh chutianga awm ve tur chuan a duh che.
Midangte in pawm a ni tih in lan chhuahtirna pakhat chu an thusawi laia anmahni en a, an thusawi ngaihthlaksak chu a ni. Mi tute emaw an mitah i en a nih chuan, an pawimawh a ni tih i puang chhuak a ni. Hmangaihna sang ber chu mite ngaihsak a ni.
Hmangaihna chuan a en a, a ngaithla bawk. Nang engnge i dinhmun? I enin i ngaithla ve em? Mi tuten emaw i dawhkanah thil eng emaw an lo dahin anmahni i lo en em, thil eng emaw i lo sawipui em? Thingpui dawra thil i ei chang emaw nepnawi dawra thil i leia a nghaktuten an puih chang che chuan an mitah enin “Ka lawm e” i ti thin em? Thil te tak te angin a lang mai thei. Mahse tute emaw i lo ngaihsak a nih chuan, rei lo te chhung pawh, mihring an nihna ang chuan i lo zah a, anmahni i lo pawm tihna a ni.
Bible chuan Rom 15: 1 ah hetiang hian a sawi, “Keini mi chak zâwkte hian mahni lâwmna zawng lovin, chak lo zâwkte chu an chak lohnaah kan ṭanpui tûr a ni,” tiin
Mitinte hian hlauhna leh rinhlelhna kan nei vek. Midang i pawm a nih chuan an hlauhna leh rinhlelhnate chu i lo ngaihthlaksak tihna a ni. Miten Pathianah rinhlelhna an nei a nih chuan, anmahni i ngaithla phawt ang a, tichuan anmahni i lo hmangaihna leh pawmna chu a ngai reng tih i hriattir ang. Eng vangin? A chhan chu, chutiang chiah chu Pathianin min hmangaih dan chu a ni.
Kan rinhlelh chang pawhin Pathian hmangaihna chu a ngai reng tho. Hlauhnain kan nun a tihbuai chang leh Pathian rin harsa kan tih chang pawh chuan Pathian chuan min la hmangaih tho ṭhin.
Isua hmangaih tih awmzia chu midangte amah Isuan a hmangaih anga hmangaih ve chu a ni. Tichuan chu hmangaihna chuan a paltlang che a nih chuan midangte tiamkam awm lova hmangaih ve chu i thei tawh ang.
Ngaihtuah zui atan
Mi tu emaw i pawi sawi mai zel leh hmangaih harsa i tih tak mai kha han ngaihtuah teh. Pathianin eng tiang takin nge a hmangaih che a, a lo pawm che tih i ngaihtuah chang chuan chu mi i hmuh dan chu engtiangin nge thlak danglam a nih?
Mi tu emaw an mit ngeia en chu chu mi tan chuan engtianga danglam nge a lo nih ang?
Eng tiangin nge Pathian chu i lo rinhlelh le? I rinhlelh chang pawh chuan a lo pawm zel che a ni tih i hria em?
*Isua chu i zui thei dawn em?*
Pathian chuan a hmangaihna chu a Fapa, Isua Kristaah chuan a lantir a. Bible pawhin hetiangin a sawi, “Pathianin khawvel a hmangaih em em a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zawk nan." [Johana 3: 16]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e.
[ *Lettu* : Peka]

No comments:
Post a Comment