Friday, September 15, 2023

RINNA HUAISEN CHUAN KAWNG HLAUHAWM A DAI

 Ni 50 Chhung Rinna 

By Rick Warren

— Sept 15, 2023


“Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan.” [Ephesi 3:20]

Huaisen taka rinnaa nun tih awmzia chu eng nge? Kawng hlauhawm dai a ni. 

Bible chuan “Rinna lo chuan Pathian tihlâwm rual a ni lo,” tiin a sawi [Hebrai 11: 6] 

Talent neitute chungchang tehkhin thuah khan kawng hlauhawm dai chungchang chu kan hmu. Matthaia 25-ah chuan Isuan mi pakhat a zin bo chhunga buaipui tur a chhiahhlawhte hnena “talent” – pawisa tam tham tak – petu chungchang kan hmu. Mi pakhat hnenah talent khat a pe a, midang hnenah talent hnih, midang leh hnenah talent nga.  

Talent nga kawltu chuan a peipung a, a let a pe a. Talent hnih neitu pawhin a peipung a, a let bawk a pe ve a. An pu a lo hawn a, an thiltih a lo hmuh chuan, hetiang hian anmahni a fak a ni, “I ti ṭha e, bawih ṭha leh rinawm,” tiin [Matthaia 25: 23]. 

Mahse talent khat chauh dawngtu chuan a hlau a, a talent dawn chu leiah a phumbo ta a. An puin chu chu a hmuh chuan, “'Bawih sual leh zawmthawpa … Chuti a nih a hnu, ka tangka chu sumdawngtute hnenah lo dah tawh tur i ni, chutichuan, ka lo haw hian ka ta hi a pung nen ka hmu leh tur a ni,” tiin a hau ta a [Matthaia 25: 26-27]

Isuan zirlai zir tura min duh chu hei hi a ni: Pathian chuan rinna thuah chuan kawng hlauhawm dai turin a duh che. A thilpek che chu a tam thei ang ber i peipun chuan mawhphurhna sang zawk a pe ang che. Mahse i hlauh a, kawng thar i dai loh chuan, i lo rinawm lo daih ang – rinnaah chuan lem a chan theih loh – Pathianin a thil kawltirah che chuan. Chu chuan i theihna, inlaichinna, sum leh eizawnna te a huam ang. 

Saddleback Kohhranin ram acre 120 Orange Country, California-a an lei lai kha ka la hre reng. Kha venga mite khan, “Heng mite hian tu nge nia an inhriat? Engah nge chutiang zat ram chu Orange Country-ah chuan an lei ve ngawt” tiin an elsen a ni.  

An thusawi ka hriat chuan, “Zawhna dik lo a ni” tiin ka lo dangchat a, zawhna dik zawk chu: “Tu nge Pathian chu nia kan hriat?” tiin ka lo chhal hlawm a. Tichuan Pathian anga lian hmathlir ropui chu kan um ta a ni. 

Ephesi 3: 20 ah chuan, “Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan,” tih kan hmu. 

Tichuan hmalam pan rawh – huaisen takin ka la, nghet takin rinna chu vuan rawh. Pathian chuan i suangtuahna ropui tak chu sang tak a thlenpui thei che!

Ngaihtuah zui atan. 

Rinna huaisen taka nunpui turin eng ang harsatna nge i lo hmachhawn thin? 

I nunah khan dinhmun khirh leh inlaichinna harsa deuh kha han ngaihtuah teh. I chakna hmachhuan lovin Pathian chakna ringin kal ta la, engtiang takin nge a danglam ang? 

I hmelhriat zingah huaisen taka rinna nunpuitu chu tu nge? An rinna khawi lai kha nge langsar zual? 

[*Lettu*: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...