_Hmangaihna nen ni 40_
- Rick Warren
Sept 23, 2023
Pathian hi engkimah a hmasa ber a ni thin a. Bul a tan thin. Pathian i hmangaihna leh mi dang i hmangaih theihna chhan chu Pathianin a hmangaih hmasak vang che a ni.
Bible chuan 1 Johana 4:19-ah, "Min hmangaih hmasak avangin kan hmangaih a ni" a ti.
Pathian hian min hmangaihna hi kawng hrang hrangin a lantir a. A hmangaihna chu Isua Krosah i tan thi tura tirin a lantir a. A hmangaihna chu a siam che khan a lantir bawk a. I nuna i neih zawng zawng te hi pe chein a hmangaihna che a lantir leh a. Pathianin min hmangaih hmasak avangin kan hmangaih a ni.
Mi dangte hmangaih dan i zir chuan, Pathianin a hmangaih dan che hi i hriatthiam hmasak a ngai a ni. Phutlet nei lo Pathian hmangaihna i lo hriat chuan, mi dangte hriatthiamna nasa zawk i nei dawn a ni. Tunhma angin i thin a rim mai tawh dawn lova. I dawhthei tawh hle anga. I ngaidam thei mai tawh anga. Zah i ngai theiin, mi dang lakah khawngaihna i lantir thei tawh dawn a ni.
Mi dangte teh ching, deuhsawh ching, thinchhe em em, mahni ngaiha dik in ti, mi dangte dahhniam ching takte hian Pathian hmangaihna an hriat chian loh vang a ni. Hmangaihna an dawng lo emaw ngaihdamna an tawn loh thin avangin anmahni lakah pawh nuam an ti lo fova. Pathian khawngaihna an hrethiam lova, inthiam lohna leh indemna nasa tak an nei a ni. Mahni an indem nasat chuan, mahni chunga i lungawi kha an hmu thei lo a ni.
Chutiang zinga mi chu i ni ve mai thei. I nu leh pa emaw, thawhpui leh kawppui tu emawin an lo tina tawh che a ni mahna le. I lakah dik lo taka thiltih emaw, hman dik loh emaw, hnawl emaw, kalsan emaw pawh i lo ni thei e. I thinlungah ser nung i nei tlat pawh a ni thei e.
Thutak chu hei hi a ni: Nangmah ngei pawhin i la dawn loh chu mi dang hnenah i pe thei lo a ni. Mi dang hmangaih ngai lo chuan hmangaihna an la dawng ngai lo a ni thei a. Natna nei chuan mi dang an tina a. Thinrimna leh dawhtheihlohnaa i khah chuan, hmangaih niin i inhre lo tihna a ni. Tumah i hmangaih thei ngai lovang.
Pathian hmangaihna che i hriat a, i thinlung i tihdam tirin a hmangaihna chu nangmahah kaltlangtir la. Mahni i inhmangaih hmasak loh chuan mi dangte i hmangaih thei ngai lovang.
Bible chuan, "Pathianin keimahnia hmangaihna a neih chu kan hria a, kan ring bawk a ni" (1 Johana 4:16) a ti.
Pathian hmangaihna chu i hria em? Pathianin a hmangaihnaah hian i innghat ngam em? Pathian hmangaihnain a kaltlang che chuan mi dang hmangaih i awlsam zawk dawn a ni.
Ngaihtuah zui atan...
Pathian hmangaihna hian mi dangte i hmangaih thei em? A nih chuan, engtin nge chu hmangaihna chu mi dangteah i lantir theih ang?
Pathian hmangaihna i hriat hian mi dangte lakah khawngaihna lantir turin engtin nge a puih che?
Pathian hmangaihna lak ata dang tlattu che leh mi dangte laka hmangaihna lantir thei lo tu che i nunhluia natna i neih engte nge?
(Lettu: Msa)

No comments:
Post a Comment