Hmangaihna Nen Ni 4
- Rick Warren
- Sept 25, 2023
Hmangaihna chu thinlunga min den dan lam ringawt a ni lo va, thiltih lam a ni. Eng emaw i tih kha hmangaihna chu a ni.
Min hmangaihtute hmangaih let ve hi thil awlsam tak a ni, a ni lawm ni? Thil tih ngai a awm vak lo tlat.
Mahse, hmangaihna tak tak chu miten phu lovin, chhanglet lovin hre lo mahse a che tho ṭhin. A nihna takah chuan, hre miah lo chunga hmangaihna hi sang ber a ni. Kan en anga min en let ve lo tute kan hmangaih tlat hi hmangsihna puitling zia a ni.
I ngaihtuahna te a taka chantir aiin i thil mila ngaihtuahna sen a awl zawk tih hi i hria em?
Ṭhenkhat chu hun rei tak chhung lo innei tawh in ni, a dik tak chuan in inneihna meichher nung kha a thi tawh a ni. Phûrna a bo a. In khata chêngdun reng siin nun hrang daih in nei. Chu inhmangaihna dai mek chu engtinnge in tihalh thar leh ang? Hmangaihna chu engtia chhem nun leh nge i duh?
A taka i chet chhuah hnuin i rilruin i ngaihtuah ṭhin. "Ka nupui/pasal laka hmangaihna lantir ka peih lo" i ti a ni mai thei. Anih leh engnge? I cheziaa hmangaihna i lantir hmasa anih chuan i thinlungah a rawn zui nghal ang tih chiang takin ka sawi thei- a chhan chu kan nungchang, kan chezia hi kan rilruin a zui ṭhin avangin.
Thupuan 2:4-5ah chuan Isuan kohhranho hnenah heti hian a sawi, "Mahse demna che ka nei a ni: i hmangaihna hmasa ber i bansan ta hi a ni. Chuvangin, khawi lai aṭanga tlû nge i nih hre reng la, inlamlêt bawk la, a hmaa i tih ngai kha ti leh rawh."
Isuan kohhran hnena a sawi hi nupa kara inhmangaihna tihnun thar leh nan pawh hman tur a ni. Sim la, a tira i thiltihte kha ti leh rawh. Hmangaihna a lo daih chhan chu a tira hmangaihna thlentu thil i tih ṭhinte i tih tawh loh vang a ni.
Pathianin i rilru suangtuahna mai mai nunpui turin a duh lo che. Rinnaa nung turin a duh che a ni. Tichuan engnge a tih i hria em? A chang chuan i ngaihtuahna te a la bo daih ṭhin. Tichuan rinnaa nun leh rinnaa hmangaihna nun neih i lo ngai ta ṭhin a ni.
I hmangaihna an chhang let lo chung pawha mite i hmangaih a, chumi avanga thil i ti a nih a, engah mah an ngai lo anih pawhin rinnain i hmangaih tihna a ni. Chu chu a taka thil tih chu a ni.
Ngaihtuah zui atan.
I kiang vela mite i hmangaihna engtinnge thiltihin i lantir ang?
Hmangaihna nei miah lo i kiang vela mite khan hmangaihna an hriat theih nan engtinnge thiltihin i hmangaihna i lantir ang?
"A hmaa i thiltih" engte nge inlaichinna ṭhan len nan i tihthar leh ṭul le?
[ *Lettu*: Mapuia Fanai]

No comments:
Post a Comment