Monday, September 18, 2023

PATHIAN THU AWIH VEK HI AMAH KAN RINNA AWMZIA CHU A NI

 Ni 50 Chhung Rinnaah

- Rick Warren 

- Sept 18, 2023


"Lalpa, i thupekte chu a vaia kan zawm atan min pe a ni si a" (Sam 119:4, NCV)

A ṭhen chauh awih hi thuawihna a la ni lo. Pathian thupek eng ber hi nge ka zawm ang tiin i thlang thei lo.

Pathian thupek chungchangah hian thil i hriat tur pahnih a awm:

Pathianin dik leh dik lo a tehfung hi a danglam ngai lo.

Kum 6000 kal taa thil dik lo kha tunah pawh a la dik lo reng. Kan hnam nunphung a danglam. Mite ngaihdan a danglam. Mahse thudik chu a danglam ngai lo. Thudik chu chatuan daih a ni.

Pathian thil thlir dan hi i thlir dan aiin a zau zawk.

Pathian chuan i hmuh phak loh kha a hmu tlat. Kan hmuh tawh, hun liam tawh en let leh emaw ka hma hun, chatuan hun tur, kan la hmuh ngai loh lo enlawk hi mihringte theihna hian a phak lo.

Pathianah rinna i nghah a ngai. "He dan hi dik nge a dik lo tih hi i lo bûk ve tur a ni lo, a zawm kha i tihtur chu a ni." (Jakoba 4:11, TLB)

Thlemna upa ber chu tualthat tura thlemna emaw  tisa chakna emaw a ni lo. Pathian thu rinhlelhna hi thlemna upa ber a ni. Setana Evi a thlemna, "Pathianin huana thei rah reng reng hi in ei tur a ni lo, a ti maw?" (Gen. 3:1) a tih ang khan, Pathianin a sawi tak meuh maw tih hi mi thlem nan a la hmang reng. Pathian thupek aia a duhdan/chakzâwng kha a pawimawh tiin a hneh a nih kha.

Kan hriatthiam lai chin chauh emaw zawm nuam kan tih lai chin chauh emaw zawm lova a kip a kawia Pathiana rinna nghah leh a thuawih hi rinna chu a ni. Thufingte 3:5-ah chuan heti hian kan hmu, "Mahniin engkim chinfel tum lo la, i thinlung chhungril tak aṭangin Pathianah rinna nghat rawh." (MSG)

Namaana thawnthuah khan a zawng zawnga Pathian thu awih a ṭulzia kan hmu (2 Lalte 5). Namaana kha Suria sipai hotu a ni a, phar natna a vei bawk. A chhiahhlawhte zinga pakhatin zawlnei Elisha-in a tihdam theih tur thu a hrilh. Namaana chu Elisha in kawngkhar a thlenin zawlnei kha a kawngkharah a rawn chhuak miah lo. A chhiahhlawh rawn tirin Namaana chu Jordan luia vawi 7 inbual turin a rawn hrilhtir a ni.

Namaana kha a thinrim em em mai, a chhan chu zawlnei khan mimal takin a rawn hmachhawn lo a, ti tura a rawn tih lah thil atthlak tak ang a ni si. Chutah Namaana chuan haw mai a tum ta a.

Mahse a chhiahhlawhte chuan Elisha thu a zawm avanga chân tur engmah a nei lo tiin a rilru an hmin thei hram. Tichuan Namaana chu Jordan luiah chuan kalin vawi 7 a inhnim ta a. Pathianin a tidam ta a ni!

Namaana kha thinrim takin haw ta nge thil awm dan tur han ngaihtuah teh. Tuiah khan vawi 6 chauh inhnimin Pathianin mi â ang maiah min siam a nih hi ti ta se engtinnge a awm ang?

Mahse Namaana chuan Pathian thu a kip a kawiin a awih a phar natna ata a lo dam ta.

I thinlung zawng zawnga Pathian thu i awihin engnge lo thleng ang tih ngaihtuah teh le.

Ngaihtuah chhunzawm atan.

I nunah Pathian thu ṭhenkhat chauh i awih lai a awm em? Engin nge Pathian thu zawng zawng i awihna dal le?

Pathian thu awih vek i tumna kawngah engin nge harsatna thlen che?

A tira i rinhlelh chang pawha Pathian thu i awih pumhlun avangin engtinnge i nunah Pathianin hna a thawk ni a i hriat?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...