Sunday, September 17, 2023

ENGVANGIN NGE TIH I HRIAT VEK A NGAI LO

 Ni 50 Chhung Rinnaah

- Rick Warren 

- September 17, 2023



"I thupekte chu ka zawm thuai ang."(Sam 119:32, NCV)


Hmanhmawh taka thil tih vat vat i ngaih hun a awm anih chuan Pathianin ti tura a tih hun che a ni ngei ang - a chhan i hrethiam lo anih pawhin.


Sam 119:32-ah chuan heti hian kan hmu, "I thupekte chu ka zawm thuai ang." (NCV)


Thil eng emaw aṭanga hlawkna i hmuh dawnin i hriatthiam vek a ṭul kher lo. Engtinnge thlawhna lian tak takte hi vansangah khian an thlawh theih ka hre miah lo, mahse thlawhtheihnaah erawh ka chuang fo. Engtinnge _computer_ hian hna a thawh ka hre miah lo, mahse pakhat chu ka inchhawp a, ka hmang reng bawk. Engtinnge motor engine-in hna a thawh ka hre lo, mahse kum tam tak chhung lirthei ka lo khalh tawh.


Thil eng emaw i hlimpui a i hlawkpui turin a chungchang engkim i hriatthiam vek a ṭul ber lo. Pathian thu i awih aṭanga hlawkna i hmuhna turah engvanga Pathianin tih tir che nge a nih tih i hriat vek a ṭul kher lo.


Fa i neih chuan i fate hnenah eng emaw ti turin i ti a, "Engvangin nge ka tih ang?" ti a an lo chhan che chuan, "Ka sawi avangin" tiin tawitein i chhang fo ang.


Chutia i tih chuan thil tam tak i sawi a ni. "Nang aiin hun ka hmang tam tawh zawk a. Hrethiam turin i la nau deuh a ni, mahse engtikah emaw i la hrethiam ve mai ang. I tana ṭha turin a ni ti rawh ka tih ni." i tihna a ni thei.


"Ka sawi anih avangin" ti theitu an awm chuan Pathian ngei a ni ang, engkim tithei, engkim Siamtu leh lei leh van leh kan Pa Vana mi a ni ngei ang. 


Bible-ah hian Pathianin a hunbi sawi lova thu a pek chuan ti thuai turin a beisei tihna a ni.


Entirna han pe ta ila. Kan fate an ṭhanlen mek lai khan ka nupui Kay-i chuan zanriah kil turin hunbi a ruat fo ṭhin  "Dar 5:30-ah lokal rawh u" a tih chuan chumi hunah chiah chuan kil hman tura kan inpeih a ngai. Mahse "Chaw lo ei rawh u" a tih ringawt chuan tunah a tihna a ni tih kan hre mai.


Naupangte chuan thu zawm mai lova infiam khawtlai an thlang fo ṭhin.


A chang chuan i aw an hre lo der ṭhin. Hetiang hian Pathian chungah kan awm fo. Fiah takin min hrilh mahse kan haider lui fo ṭhin.


A dang leh chu: "I nu kha midang bia angin ngai la": "5:30-ah zanriah ei turin min tihna a ni lo tiraw?"


Hetiang chiah hian Bible kan chhiar a, Pathian thupekte kan chhiar hian midangte hnena a sawi niin kan ngai tlat ṭhin.


Mahse hengte hian Pathian a tibuai tham lo. Hengte hi Pathian laka rilru dik lo putna, a thuneihna leh ruahmanna rin lohna a ni.


Rinna chu Pathian thupekte, hrethiam lo chung leh harsatna a awm hmu chunga rang taka zawm hi a ni a. Pathian chu nangmah a hmangaihna chein a nawr kal a, i tana ṭha ber a ngaihtuah ṭhin tih hriain rinna nen ke pe rawh.


Ngaihtuah zui atan.


Pathian thu zawmna kawngah engtinnge zawm mai lova thildang tih kual i tum ṭhin?


Pathian thu zawm lawk loh avangin engte nge lo thleng ṭhin?


Pathian thu i zawm thuai theih nan engtinnge ke i pen ang? Vawiin hian eng ber nge i tih hmasak ang?


*Isua lokal leh hunah engnge i tih ang?*


Bible chuan Pathian Fapa Isua Krista i rin chauhin vanram i lut thei ang a ti. Vanram hi thawh chhuah chi a ni lo: "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e." (Ephesi 2:8-9)


Isua hnenah i inhlan duh takzet anih chuan heti hian ṭawngṭai rawh le:

"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.


"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."


Isua pawm tura i ṭawngṭai a nih chuan  Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


(*Lettu*: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...