Friday, August 4, 2023

I THLAUHTHLAK A NGAI

 Midangte Nen A Tha Zawk

By Rick Warren

— Aug 04, 2023



“Tu pawhin tu chungah pawh thu pawi nei ang ula, indawh tawnin in ngaidam tawn ula; Lalpan a ngaidam che u ang tak khan ngaidam ve rawh u.” [Kolossa 3:13]


Tun hmain i hre tawh mai thei – nangmah ngei pawhin i lo tawng tawh mai thei – thil inang lo an inhip tawn tih hi. Nula tlangval i nih lai chuan nangmah ang ni lo chu nawm hmel riauin i hmu a. An nungchang leh mizia nangmah ang ni lote chu nawm hmel leh itawm riauin i hmu ṭhin. Tichuan, ngaihzawng neiin emaw nupui pasal neiin emaw i awm ve ta a, kum a vei meuh chuan, thil nawm hmel tak takte chu nangmah tihrehawmtu an ni daih thei. Tun hmaa nangmah hiptu che kha i huat zawng tak an ni daih thei! Inlaichinna thua kan beiseina tihthlawna a awm chang chuan thinrimnaah a chang thei. 


Vawi eng emaw zat chu min tithinrimtute hi hringnuna thil lian thamte an ni kher lo. Thil te tak te te inremkhawm an nih chang a awm. Huatna chu thinrimnaah a chang a, tu emaw chu engvangin nge i lo hmangaih theih zawk tih thlengin i chhut hial ang. 


Mi famkim lo vek kan ni. Mi tu emaw chu i la tina dawn a, miten an la tina bawk ang che, tihluih a ni thei a, tihpalh pawh a ni thei. 


Hringnunah hian nat chang i la nei dawn tih chu thudik a ni. Zawhna awm thei chu, chu natna chu engtin nge i lo hmachhawn dawn? Nangmah i insiamṭhattir dawn nge, in intihkhaktir zawk dawn? 


Thinrimna chuan a tikha satliah ngawt lo ang che. Mite nena in inlaichinna a la sawpchhe dawn. Kan mi hmangaih ber berte chu kan huat zui ber ber an ni hial thei.  


Thinrimna tuamdamna chu ngaihdamna a ni. Thinrimna chuan inlaichinna a pawt ṭhiat vek a, ngaihdamna chuan a dinthar leh ṭhin. Inlaichinna dam chhung daih din i duh a nih chuan, ngaihdamna tam tak i mamawh dawn tihna a ni ang. Kolosaa 3: 13 ah chuan, “Tu pawhin tu chungah pawh thu pawi nei ang ula, indawh tawnin in ngaidam tawn ula; Lalpan a ngaidam che u ang tak khan ngaidam ve rawh u,’’ tih kan hmu. 


I nunah chuan lungawi lohna i neih vangin thinrimna a inchhekkhawl phal suh. Nangmah i inti na mai mai a ni! Chungte chu thlauhthlain hmathlir mumal tak nei turin i nun bul ṭan thar leh ang che.  


Ngaihtuah zui atan. 


Eng tik hunah nge i natna chu thinrimnaah i chantir tih engtin nge i hriat theih ang? Engtik hunah nge midangte chu i ngaihdam tih i hriat theih ang? 


Eng vangin nge lungawi lohna chuan mite ai chuan an tihnat zawk che? 


Midangte awlsam zawka i ngaihdam theih nan engtin nge Pathian ngaihdamna chu nangmah leh nangmah i inhriattir nawn theih ang? 


 *Vawiin hian Isua i zui dawn em?* 


Bible chuan hetiangin a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16] Chatuan nunna chungchanga Pathian thutiam hlen tur ring tur chuan i lo inpeih tawh em? A nih chuan, he ṭawngṭaina tawite hian han ṭawngṭai teh: 


“Lalpa duhtak, Isua Krista chu I Fapa a ni tih ka pawm a. Ka sualte thupha ka chawi a, i ngaihdamna chu ka dil a ni. Isua chu ka sualte la bo turin a thi a, i kai tho leh a ni tih pawh ka ring e. Isua chu Chhandamtuah ka pawm duh a, vawiin aṭang hian ka Lalpa atana zui turin ka inpeih e. Ka nun hi hruai la, a duhzawng tih min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...