Thursday, June 1, 2023

NANGMAH DOTU LAKAH ṬHAT CHHUAH RAWH

Malsawmna Dawng Nun Rahbi

By Rick Warren

— June 1, 2023



““Ka thu ngaithlatute u, nangni zawng ka ti a che u, in hmêlmate chu hmangaih ula, a hawtu che u chungah chuan ṭhat chhuah ula,  ânchhe lawhtu che u chu malsâwmna dîlsak ula, a tiduhdahtu che u chu ṭawngṭaisak rawh u. “I biang lehlam bêngtu hnênah a lehlam pawh dawh rawh. I puan lâksaktu che chuan i kawr a lâk pawh hnial suh.” [Luka 6:27-29]


Miin an tihduhdah che a, an sawisak che a, nangmah dotu i neih changin anmahni malsawm zawk ang che. 


Lal Isua chuan Luka 6:27-29-ah chuan ““Ka thu ngaithlatute u, nangni zawng ka ti a che u, in hmêlmate chu hmangaih ula, a hawtu che u chungah chuan ṭhat chhuah ula,  ânchhe lawhtu che u chu malsâwmna dîlsak ula, a tiduhdahtu che u chu ṭawngṭaisak rawh u. “I biang lehlam bêngtu hnênah a lehlam pawh dawh rawh. I puan lâksaktu che chuan i kawr a lâk pawh hnial suh,” tiin a sawi. 


Tuin nge chutiang chuan ti? Mi tam tak an ni lo, dik tak chuan. Chutiang thil chu ringtute ṭhen darhtu an ni tlat zel – a chhan chu thil pangngai a ni lova, a lar lova, a awlsam lo bawk. 


Chutianga che tur chuan mi tumruh tak nih a ngai! Tu te pawhin phuba lain an duh duh an sawi mai thei a. Mahse thil ṭha lo ṭhatnaa chhang tur chuan mi tumruh nih ngei ngei a ngai. 


Pathian chuan hmelmate hmangaih turin a duh che a, nangmah hawtu che hnenah ṭhat chhuah turin, atchelawhtu malsawm turin, nangmah tinatu ṭawngṭaisak turin, i biang lehlam dawh turin. A awlsam em? Aih. Mahse, thuhretu nih dan ropui ber a ni thung – Pathian hmangaihnaa i khah phawt loh chuan chutiang chuan i ti thei ngai lovang. 


Lemchan pakhat The Butler tihah khan America chhim lama Mimal Zalenna Beihpui kawnga a mei zang hlaptuten chi inthliarna an do lai khan anmahni tiduhdahtuten an vuak a, chil an chhak a, anchhia an lawh a, a nam sawk sawk a, mite ei tur hmanga an vawm lai khan beih let loh an zirtir a ni. Tharum thawhna tel lo va chet chhuah chu thil awlsam lo tak a ni.   


Chu lemchan ka thlir lai chuan ka biangah mittui a luang zaih zaih a. Hetiang hian ka ngaihtuah a, “Isua tan chutiang mi chu ka ni ve duh a ni. Chutianga huaisen chu. Miten eng anga min cheksawlh chang pawha anmahni tilet ve miah lo khawpa mi tumruh chu nih ka duh. Hmangaih thil dawngsawngtu nih ka duh a ni,” tiin. 


Phuba la duh lova, mi tu emaw nangmah duh lotu che thiltih chu hmangaihnaa i lo chhanlet chuan Pathian chu i tilawm ang. Tichuan ani chuan mal a sawmsak ang che. 


Isua chuan, “Felna avânga tihduhdah tuar hnute chu an êng a thâwl e; Vânram an ta a ni si a. Miin keimah avânga an hau che ua, an tihduhdah che ua, dâwta sual tinrênga an hêk hunah che u, in eng a la thâwl ang. Lâwm u langin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha,” tiin a sawi.


Isuan i bat a tlaksak che. Tichuan ani chuan amah zuiin thil tam tak i bat ngai niin a sawi. Ringtu i nih chiah chuan, he khawvela larna chu i chanvo a ni kher lo va – mahse vana i lawmman erawh ihe lova i chan tur an ni. 


Ngaihtuah zui atan. 


Isua Krista tana tuarna tih chu engtiangin nge i lo dawnsawn ve tawh ṭhin? I chhanna chuan mite hmuhsitna leh duhlohna chu engtin nge a nghawng ṭhin? 


Eng vangin nge mite an sualna anga thungrul lova hmangaihnaa dawnsawn chu Krista thuhretu nihna dan thiltithei ber nge a nih? 


Hmelmate hmangaih vanga nun inthlak chu i lo hmu ve tawh em, anmahni tinatute tana ṭawngṭaina leh biang lehlama bengtu tana a lehlam dawhna nun chu? 


*I chatuan hmun khawiah nge i hman dawn?* 


Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]


“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.


“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[*Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...