_Ni 40 chhung Pathian Thuah_
- Rick Warren
- May 04, 2023
_"I chunga thil ka tihsual loh nân I thu chu ka thinlungah ka khawl khâwm a."_ (Sam 119:11)
Lal Isua hnung i zuinaah chak leh puitlin i duh chuan Pathian thu i vawn a ngai. Pathian thu chu thudik a ni a, i thinlunga i tuh tlat chuan ṭhanlenna hmanraw ṭangkai tak a ni.
Sam 119:11-ah chuan, _"I chunga thil ka tihsual loh nân I thu chu ka thinlungah ka khawl khâwm a."_ a ti. Thinlunga Pathian thu thukru a, vawn hian thil sual kawnga bo lo leh rinna kawnga puitling turin a pui che a ni.
Pathian thu i lo la vawng ngai lo a nih chuan a huphurhawm viau mai thei. Mahse, i ti thei a ni! I ṭha tawk lovah i inngai a ni mai thei a, vawn harsa i ti pawh a ni mai thei. Pathian thu i vawn theih nan vawiin aṭanga i tih ṭan theih kawng awlsam ṭhenkhatte chu:
*1. Nangmaha thusawitu chang thlang rawh:*
I vawn a ngai a i hriat vang ringawtin chang thlang suh. I nun a thlak danglam dawna i hria a nih chauhin vawng ṭhin rawh.
*2. A thu i sawi hma leh sawi hnuin a bung leh chang sawi ṭhin rawh:*
Entirnan, vawiin a kan chang thlan te pawh hi hetiang hian han sawi chhin la, _"I chunga thil ka tihsual loh nân I thu chu ka thinlungah ka khawl khâwm a."_ (Sam 119:11). A chang chuan a bung leh chang hi hriatreng harsa ber a ni fo. Chuvang chuan, a ri a a thu i sawi hma leh sawi hnu a a bung leh chang sawi hian hriat a ti awlsam thin.
*3. A riin chhiar la, vawi tam tak chhiar rawh.*
Mi tam tak chuan an thil chhiar ni lovin an sawite zawk an hre reng ṭhin. Bible chang a ri a i chhiar khan i rilruah i vawng ṭha tihna a ni.
*4. A nihna ang takin vawng rawh.*
I vawn hma chuan Bible thute hi tihdanglam tum suh. Bible-a a inziah dan ang takin vawng rawh.
*5. Kartin Bible chang khat zel vawngin bul ṭan rawh.*
Hun a kal hlek anga, kar khatah chang hnih i vawn theih hun a lo awm ang, mahse muangchangin bei rawh. Zirlai danga ka sawi tawh ang khan kar khat chhunga Bible chang pakhat i vawn chuan kum khat chhungin Bible chang 52 zet i vawng dawn tihna a ni! Kar khat chhunga chang hnih i vawn chuan kum khat chhungin chang 100 aia tam daih i vawng dawn tihna a ni. A hun taka i ngaihtuah chhuah theih turin i thinlungah thutak leh finna thu tam tak i pai dawn tihna anih chu.
Bible bu pumpui vawng chhuak pawh ka hria. Mi fing tak an ni bik hah lo. An ti thei tih hriain bul an ṭan mai a ni- vawi khata chang khat zela vawngin.
Ngaihtuah zui atan.
Bible thu vawng turin engtinnge hma i lak? A hlawhtling em? Pathian thu i vawnna kawnga a sawt zawk nan i tih dan i thlak dawn em?
Tunge Bible thu vawnna kawngah pui thei che?
Tunkar chhung hian eng Bible chang nge vawn i duh le?
[Lettu: Mapuia Fanai]

No comments:
Post a Comment