Thursday, June 8, 2023

BIBLE HI A LO HIM TAWH A, A HIM ZEL BAWK ANG

 Ni 40 chhung Pathian Thuah

By Rick Warren

—  June 08, 2023

“Lei leh vân a ral ang a, ka thu erawh chu a ral lo vang.” [Matthaia 24:35]

Khawvel hun chhiarah Bible hi hmuhsit, cheksawlh, hnawl, inchuh, ṭhensawm leh inhnialna chawk chhuak nasa bertu lehkhabu a ni awm e. Kum za tam beih a lo tawk tawh a, engtianga nasa nge i chhut thiam lo hial ang.  

Chutichung chuan Bible chu lehkhabu chhiar nasat ber, khawvela chhuah tam ber leh lehlin nasat ber a tling tho. Tichuan, chung zawng zawng bakah chuan, a thu zirtir an nuna laluttute chu a la thlak danglam zel thei bawk. 

Kan Bible hi Pathian Thu ngei a ni tih ka pawmna chhan chu hun kal tawhah hian beih a lo tawk nasa tawh takzet hi a ni. Hun bi hrang hrang liam tawhah khan Bible kawl danin a khap lai a lo awm tawh a. Dik tak chuan, chu chu vawiin thlenga a dikna a awm. Mi tam tak man an ni a, tan ina khung an awm a, ṭhenkhat tihhlum hial an tawk, a chhan chu an Bible kawl lai chu an pek duh loh vang a ni. Chutichung chuan Bible chu a him tlat zel. 

Beitu tam tak karah, Bible chu hnam kalphung thlak danglamtu ropui ber a la ni fan. Rimawi, thiamna, insak leh thil mawi siam kawnga hmasawnna thlentu a ni chhunzawm zel. Hnam nun aṭangin Bible I la chhuak a nih chuan kum 2000 liam ta atanga rimawi huangah emaw, thil mawi siamna kawngah emaw, in sak kawngah emaw chuan hnuhma pawimawh ber berte chu kan nawh reh a ngai ang. Vawiin nia English thu leh hla pawimawh ber berte pawh chu King James Bible-in a hrin chhuahte an ni. 

Kum 2000 chuang liam ta chhunga beihna hrang hrang kha Bible chuan a lo tuar dai thei a ni. Isua chuan Matthaia 24: 35-ah hetiang hian a sawi, “Lei leh vân a ral ang a, ka thu erawh chu a ral lo vang,” tiin. Pathian Thutak chauh chu a awm reng ang – a chhan chu thutak chauh chu chatuan daih a ni. Khawvela thil tinrengte chu engtik niah emaw chuan a la boral vek ang. 

Voltaire-a, French mi fing ropui tak kha Pathian awm ring lo mi a ni. Bible beihna tam tak thu a chhuah a. Ṭum khat phei chu thu tumtlang tak a sawi nghe nghe: “Tun aṭanga kum zaah chuan Bible chu mite hnuchhawn lehkhabu a ni tawh ang” tiin. 

Vawiin hian mi tam berte chuan chu thusawi chu an hre tawh lovang a, Bible erawh an la theihnghilh lo thung!

Bible zin kawngah chuan beitu lo tlazep ve sek mahse, a ding chang zawk leh tlat zel a – a ding chang zel bawk ang. Amahah chuan i innghat thei ang. 

Ngaihtuah zui atan. 

I nunah khan Bible chuan eng nge danglamna a thlen ve tawh? 

Matthaia 24: 25 in a sawi ang chuan engtik niah emaw chuan van leh khawvel a la bo ang a, Pathian Thu erawh a awm reng ang. Chu thutak chu – i nun chuan engtin nge a tarlan a, a tarlan loh? 

Khawngaihna, lainatna, leh finna nena nangmah dotute i hmachhawn tlat theih nan Pathian hnenah huaisenna chu dil tlat ang che. 


[*Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...