Sunday, May 7, 2023

ZAIDAMNA HI MI HIP THEIHNA A NI

 _Malsawmna Dawng Nun Rahbi_

- Rick Warren

- May 7, 2023



"Aw, nang Pathian mi erawh chuan chûng thilte chu tlansan la; dikna te, Pathian ngaihsakna te, rinna te, hmangaihna te, dawhtheihna te, nunnêmna te chu ûm zêl rawh." (I Timothea 6:11) 


Mi duhawm nih i duh em? Hmelṭhat te chu i ngai pawimawh vak lo a ni thei; mahse, duhawmna hi chu kan vun lang thei mai ai hian a thuk zawk a ni. Mi duhawm tak chuan chhunglam leh pawnlam aṭangin mi mit a la ṭhin.


Bible chuan, duhawm i duh chuan zaidam i zir a ngai a ti. _"Aw, nang Pathian mi erawh chuan chûng thilte chu tlansan la; dikna te, Pathian ngaihsakna te, rinna te, hmangaihna te, dawhtheihna te, nunnêmna te chu ûm zêl rawh."_ (I Timothea 6:11)


Zaidamna chu kan thuhnuai theih chakna a ni. Lal Isua zuitu chhinchhiahna pakhat a ni. Zaidamna chuan i bula mi te lakah duhawmin a siam ang che.


Bible chuan Ruthi leh Boaza chanchin hetiang hian min hrilh a, mi zaidam tak pahnih in duh tawn em em te chuan khawvelah danglamna an thlen a ni a ti. 


Boaza chu loneitu naupang te hlawhtling tak a ni a. Nikhat chu a loah chuan mikhual pakhat a hote buh seng bang zawng khawm a lo la ve ṭhin chu a hmu a. Chu chu thil danglam tak pawh a ni hran lo, mi harsa zawk ten eitur an zawn ve ṭhin dan a ni.


Mahse, chung zingah chuan hmeichhe pakhat Ruthi chu a lo chhinchhiah bik a. A retheih chhan chu a pasalin boralsanin intunnunna tur eng tham mah a hnutchhiah loh vang a ni. A pasal a nu pawh hmeithai bawk a ni a, Ruthi chuan Naomi chu enkawl turin a bula awm a thlang a ni. Engvangin nge chu chu Ruthi chuan a tih? A nunnem avangin,  Boaza'n a lo a Ruthi a hmuh khan kal bo turin a ti thei. Mahse, a lo a buh te chu seng a phalsak a a pasal a nu a enkawl avangin a fak bawk a ni.


Ruthi chuan, _"Ka pu, i duhsak zâwnga awm zêl ka duh e; i chhiahhlawhnute zîngah tel ve pha lo mah ila, i ṭawngkam ṭhâ hian i bâwihnu hi min tithlamuang ta huai mai"_ (Ruthi 2:13-14) a ti.


Tichuan, Boaza chuan Ruthi chu chawhlui kilpui turin a sawm a. A puar hma chu a ei a, a hawn tur a pek belh bawk a. A ngilneiin a zaidam a ni. Mi thil ti thei tak a ni a mahse chu chu a thuhnuaia dah a tum tlat a midangte buaipui nan a hmang ta zawk a ni.


Boaza leh Ruthi chu an innei ta a, an tuchhuan chu Lal Davida a ni. Lal Davida thlah kal zelah chuan Lal Isua a lo piang a ni.


Midangte tan i duhawm em? Midangten i bula awm an chakna turin Boaza leh Ruthi te angin i zaidam em?


A nih loh chuan vawiinah hian in thlak danglamin Pathian pawm zawng lam i hawi thei- zaidamnaa bul ṭanin.


Ngaihtuah zui a tan:


Zaidamna hi chakna nen i sawi zawm fo ṭhin em? Engvangin?


I nunah tunge zaidam vanga duhawm? Eng lam hawiin nge an zaidam?


Zaidam "um" chu eng nge a awmzia?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...